DXX va Bosh prokuratura huzuridagi Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbirda hokim o‘rinbosari, Transport boshqarmasi boshlig‘i, MIB xodimi va boshqalarning noqonuniy harakatlariga chek qo‘yildi.
Qashqadaryo viloyati Ko‘kdala tumani hokimi o‘rinbosari plyonka mahsulotlari ishlab chiqarishga ixtisoslashgan xususiy korxonani “Har bir oila — tadbirkor” dasturi doirasida mahalliy dehqonlarga plyonka yetkazib beruvchi ta’minotchi korxona sifatida tayinlash evaziga 5 ming dollar talab qilgan.
Ammo u so‘ralgan puldan 15 million so‘m olgan vaqtida ashyoviy dalillar bilan ushlangan.
Tergovga qadar tekshiruv davomida, hokim o‘rinbosari o‘zining “xolis yordami” evaziga avval 10 million so‘m olgani ham aniqlangan. U muqaddam Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan sudlangan bo‘lsa-da, o‘z xatosidan to‘g‘ri xulosa chiqarmagan.
Andijon shahrida kuzatilgan holatda yo‘lovchi tashish faoliyati bilan shug‘ullanuvchi MCHJ rahbari mahalliy fuqaroning ishonchiga kirib, o‘zining mansabdor tanishlari orqali uning nomiga mas’uliyati cheklangan jamiyat tashkil etib, Eski shahar—Oltinko‘l yo‘nalishida yo‘lovchi tashish bo‘yicha aholiga pullik xizmat ko‘rsatish uchun o‘tkazilishi rejalashtirilgan tenderda g‘oliblikni qo‘lga kiritib berish evaziga 7500 dollar talab qilgan va so‘ralgan pulni olgan vaqtida ushlangan.
Tergovga qadar tekshiruv davomida, Andijon viloyati transport boshqarmasi boshlig‘i vazifasini vaqtincha bajaruvchi mansabdorning ushbu noqonuniy ishga aloqadorligi aniqlanib, u ham prosessual tartibda ushlangan.
Mazkur shaxs ham muqaddam sudlangan bo‘lsa-da, xatosidan to‘g‘ri xulosa chiqarmagan.
MIBning Toshkent shahar boshqarmasi katta inspektori byuroning markaziy apparati ish yurituvidagi parrandachilik korxonasi hisobidan aksiyadorlik tijorat banki foydasiga jami 11 million 108 ming 629 dollar va 265 187 yevro miqdoridagi qarzdorlikni undirish to‘g‘risidagi ijro ishi yuzasidan, korxonaga tegishli ko‘chmas mulklarni baholash ishlari uchun belgilangan xizmat haqini turli vajlar bilan baholash firmasi foydasiga oshirilgan narxda ko‘rsatib, bank tomonidan baholash firmasi hisobiga o‘tkazilgan ortiqcha pul mablag‘idan o‘zining ulushi sifatida 2500 dollar olgan vaqtida DXX xodimlari tomonidan ushlangan.
Farg‘ona viloyatida kuzatilgan holatda Yozyovon tumani hokimligi qoshidagi “Xo‘jalik hisobidagi uy-joylarni ro‘yxatga olish, almashtirish va taqsimlash” bo‘limi boshlig‘i o‘zining vakolatli tanishlari orqali, mahalliy fuqaroning yashash xonadoni uchun order va kadastr hujjatlarini tayyorlab berish evaziga 2500 dollar olgan vaqtida ushlangan.
Hozirda mazkur shaxslarning barchasiga nisbatan jinoyat ishlari qo‘zg‘atilib, qamoq ehtiyot chorasi qo‘llanilgan.
Izoh (0)