2025-yilgi Osiyo yoshlar o‘yinlari O‘zbekistonda o‘tkazilmasligi haqida xabar berilgandi. Milliy olimpiya qo‘mitasi ushbu holat bo‘yicha bayonot berdi.
Maʼlum qilinishicha, Osiyo Olimpiya kengashi Ijroiya qo‘mitasining yig‘ilishi bo‘lib o‘tdi. Onlayn formatda tashkil etilgan majlis kun tartibidan O‘zbekiston Milliy Olimpiya qo‘mitasi va Sport vazirligining murojaatini ko‘rib chiqish ham o‘rin oldi.
“OOK mutasaddilari yurtimizga tashrif buyurib, mamlakatimizda olib borilayotgan ulkan bunyodkorlik ishlariga yuqori baho bergan. Toshkentda qurilayotgan Olimpiya shaharchasi faqatgina yoshlar Osiyo o‘yinlari uchun emas, majmuani kelgusida o‘zbek sportining taraqqiyotini yangi bosqichga olib chiqadigan ilmiy-metodik klasterga aylantirish ko‘zda tutilgan. Unda zamonaviy sport obyektlaridan tashqari Sport vazirligi, ko‘plab federatsiya va assotsiatsiyalar, sport akademiyasi, sport tibbiyoti ilmiy-amaliy markazi kabi inshootlar ham o‘rin olib, bu maskanda terma jamoalarimizni tayyorlashdagi nazariya va amaliyot birlashadi”, deyiladi bayonotda.
Taʼkidlanishicha, pandemiyadan keyingi cheklovlar sababli Olimpiya shaharchasi qurilishi uchun zarur vositalar yetkazish jarayonida uzilishlar kuzatilgani va foydalanishga topshirish muddati kechikishini inobatga olgan holda O‘zbekiston tomoni OOKdan musobaqani yana bir yilga surishni so‘ragan.
“Biroq Olimpiya sport turlaridagi bellashuvlar kelgusida Dakar-2026 o‘smirlar yozgi Olimpiya o‘yinlariga saralash vazifasini bajarishi nazarda tutilgani bois OOK III yoshlar Osiyo o‘yinlari 2025-yilda tashkil etilishi muhimligini bildirdi”, deyiladi munosabatda.
Shu tufayli, OOK III yoshlar Osiyo o‘yinlari mezbonligini Bahraynga topshirgan va O‘zbekistonga Islom birdamligi o‘yinlari yoki Jang sanʼati va yopiq inshootlardagi Osiyo o‘yinlari kabi kattalar miqyosidagi yirik kompleks tadbirlarni o‘tkazishga tayyorgarlik ko‘rish tavsiya qilingan.
“Taʼkidlash joizki, O‘zbekiston ommaviy sport va olimpiya harakatini rivojlantirishga sodiq qolmoqda. Shu maʼnoda, Olimpiya shaharchasini barpo etish, undan unumli foydalanish va uning negizida sportimizni yangi bosqichga ko‘tarish bo‘yicha Prezidentimiz tomonidan berilgan barcha topshiriqlar ijrosi taʼminlanadi va kelajakda bu majmua yirik sport tadbirlarini o‘tkazishga har tomonlama tayyor bo‘ladi”, deya qo‘shimcha qilinadi xabarda.
Izoh (0)