Prezident Shavkat Mirziyoyev tashabbusi bilan avgust oyining ikkinchi yakshanbasi O‘zbekiston qurilish sohasi xodimlari kuni sifatida nishonlanadi.
Shu munosabat bilan bugun tantanali tadbir tashkil etildi.
Prezident matbuot kotibi Sherzod Asadov davlat rahbarining quruvchilarga tabrigini o‘qib eshittirdi.
“Qutlovda so‘nggi yillarda yurtimiz ulkan qurilish va bunyodkorlik makoniga, qurilish sohasi mamlakatimiz iqtisodiyotining tayanch tarmoqlaridan biriga aylangani alohida qayd etilgan. Sohaning yalpi ichki mahsulotimizdagi ulushi 6 foizdan ko‘proqni tashkil etayotgani buning yaqqol tasdig‘idir. Oxirgi yetti yarim yilda 26 million kvadrat metrlik qariyb 10 mingta uy-joy barpo etildi. Joriy yilda 52 ta hududda “Yangi O‘zbekiston” massivlari bunyod etilmoqda. “Yangi Toshkent” va Olimpiya shaharchasi kabi mega obyektlarda ham bunyodkorlik ishlari yuqori surʼatlar bilan olib borilmoqda.
Shu bilan birga, soha oldida katta vazifalar turgani taʼkidlandi. Ularni ado etishda katta bilim va tajribaga ega bo‘lgan ishchi va quruvchi, meʼmor va muhandislar, olim va mutaxassislar yanada jonbozlik ko‘rsatib, qurilish sohasi ravnaqini yangi bosqichga olib chiqishiga ishonch bildirildi.
Kasb bayramingiz muborak bo‘lsin, hurmatli bunyodkorlar!” deyiladi xabarda.
Izoh (0)