Shavkat Mirziyoyev 9-noyabr kuni Toshkent shahrida Olimpiya shaharchasi qurilishiga tamal toshini qo‘ydi, deb xabar bermoqda Prezident matbuot xizmati.
“Olimpiya shaharchasi xalqimizning yuksak bunyodkorlik salohiyati va o‘zbek sportining olamshumul yutuqlari ramziga aylanishiga ishonaman. Bu maskan me’moriy jihatdan mukammal, energiya tejamkor va eng ilg‘or innovatsion yechimlarni mujassam qilgan zamonaviy majmua bo‘ladi”, — degan Shavkat Mirziyoyev.
Marosimda Osiyo Olimpiya kengashi bosh direktori Husayn al-Musallam, Osiyo Paralimpiya qo‘mitasi prezidenti Majid Rashid, CAMC Engineering kompaniyasi bosh direktori Li Xaysin, O‘zbekiston sport tashkilotlari faxriylari kengashi raisi Bahodir Maxsitov va yosh sportchilar ham so‘zga chiqib, shaharchaning bo‘lajak sharoitlari va ahamiyati haqida gapirgan.
Ushbu loyihaning qiymati 289 million dollardan ziyod. Shaharcha maydoni 100 gektar. Bu yerda 10 ming o‘rinli yengil atletika va futbol stadioni, 6 ta yopiq va 7 ta ochiq sport inshootlari, suv sporti saroyi, velotrek, yakkakurash, jamoaviy sport majmualari barpo etiladi.
Ushbu majmuada Yoshlar o‘rtasidagi Osiyo va Paraosiyo o‘yinlari o‘tkazilishi kutilmoqda. Bu musobaqalar 2025-yilda o‘tkaziladi. Unda 45 mamlakat yoshlari 20 ga yaqin sport turi bo‘yicha bellashadi.
Majmua musobaqalardan so‘ng bo‘shab qolmaydi. Keyinchalik bu yerda Sportni rivojlantirish vazirligi, sport federatsiyalari va O‘zbekiston davlat sport akademiyasi faoliyat ko‘rsata boshlaydi. Majmualarda fuqarolar ham sport bilan shug‘ullanishi mumkin bo‘ladi.
Tadbirda taniqli sportchilar, federatsiyalar rahbarlari, soha faxriylari, davlat va jamoat tashkilotlari vakillari jam bo‘ldi.
Izoh (0)