Parij Olimpiadasi sovrindorlari va murabbiylariga faxriy unvon va ordenlarni topshirish marosimi — suratlarda

Shavkat Mirziyoyev 28-avgust kuni Ko‘ksaroyda XXXIII yozgi Olimpiya o‘yinlari g‘olib va sovrindorlari bilan uchrashdi. Tadbirda Milliy Olimpiya qo‘mitasi va sport federatsiyalari rahbarlari, murabbiylar, sportchilarning ota-onalari, davlat va jamoat tashkilotlari vakillari ham qatnashdi.

Ushbu Olimpiya o‘yinlari 26-iyuldan 11-avgustgacha Fransiya poytaxti Parij shahrida bo‘lib o‘tdi. Unda 200 dan ziyod davlatdan 11 ming nafarga yaqin eng kuchli atletlar qatnashdi. O‘zbekiston 19 ta sport turi bo‘yicha 90 nafar sportchi bilan ishtirok etdi. Olimpiya bahslarida o‘zbekistonlik sportchilar 8 ta oltin, 2 ta kumush va 3 ta bronza medalni qo‘lga kiritdi.

“Sizlar g‘oyat keskin bellashuvlarda yuksak jasorat va matonat ko‘rsatib, 8 ta oltin, 2 ta kumush, 3 ta bronza medalni qo‘lga kiritganingiz mamlakatimizning taraqqiyot borasidagi yuksak salohiyatini ifoda etadigan yorqin natijadir.

Bu tarixiy g‘alaba Yangi O‘zbekiston yoshlari qanday buyuk ishlarga qodir ekanini yana bir marta amalda namoyish etdi. Mamlakatimiz ishtirokchi davlatlar orasida umumjamoa hisobida 13-o‘rinni, Osiyo qit’asida 4-o‘rinni, turkiy va islom mamlakatlari hamda Mustaqil Davlatlar Hamdo‘stligi bo‘yicha 1-o‘rinni egalladi. Barchamizni quvontirgan bu natijalar O‘zbekiston tarixida ilgari hech qachon bo‘lmagan yutuqlardir” dedi Shavkat Mirziyoyev uchrashuvda so‘zlagan nutqida.

Yevropaning qoq markazida sportchilar sharafiga O‘zbekiston madhiyasi 8 karra yangrab, mamlakat bayrog‘i 13 marta baland ko‘tarildi. Prezident bu yuksak natijalar xalqimizga katta g‘urur bag‘ishlaganini ta’kidlab, sportchilarni olqishladi.

“Shu kunlarda butun xalqimiz Mustaqillik bayramining ruhi va shukuhi bilan yashamoqda. Sizlar erishgan yorqin g‘alabalar eng ulug‘ va qadrli bayramimizga munosib sovg‘a bo‘ldi. Sizlarning qahramonligingiz yoshlarimizga, chekka joylardagi sportsevar bolalarga kuch-qudrat berdi. Butun xalqimizni g‘ururlantirdi, yanada birlashtirdi. Sharaf sizlarga, rahmat sizlarga!” dedi prezident.

Davlat rahbari sportchilarga, ularning ustoz va murabbiylariga, sport delegatsiyasi a’zolariga minnatdorchilik bildirdi. Shu kunlarda Paralimpiya o‘yinlarida qatnashayotgan sportchilarga kuch-g‘ayrat va omad tiladi.

Qayd etilishicha, kelgusi to‘rt yilda sportchilarni tayyorlash bo‘yicha katta dasturlar qabul qilinadi. Har bir yo‘nalishda sport meditsinasi, farmakologiyasi, diyetologiyasi, psixologiyasi va muhandisligi bo‘yicha chet eldan malakali mutaxassislar jalb etiladi.

Bu borada “Olimpiya shaharchasi”da musobaqalar va o‘quv-mashg‘ulotlarni ilg‘or xorijiy tajribalar asosida o‘tkazish bo‘yicha alohida tizim yaratiladi. Bahodir Jalolov, Oksana Chusovitina maktablari kabi ixtisoslashgan sport muassasalari har bir hududda, har bir sport yo‘nalishi bo‘yicha tashkil qilinadi.

Zarur sport infratuzilmasiga ega bo‘lgan 15 ta Olimpiya va paralimpiyaga tayyorlash markazi, 6 ta Respublika oliy sport mahorati maktabi, 56 ta ixtisoslashtirilgan sport maktabiga mahalliy va xorijiy murabbiylar biriktiriladi. Davlat rahbari ommaviy sportni rivojlantirish milliy olimpiya harakatining ajralmas qismi bo‘lishi kerakligini ta’kidladi. Hukumatga bu borada takliflar ishlab chiqish vazifasi topshirildi.

Prezidentning 23-avgustdagi farmoniga muvofiq, Parijda bo‘lib o‘tgan XXXIII yozgi Olimpiya o‘yinlarida yuksak natijalarga erishgan sportchi va murabbiylardan bir guruhi faxriy unvon va ordenlar bilan taqdirlangan edi. Tadbirda ularga mukofotlarni topshirish marosimi bo‘lib o‘tdi.

Quyida Ko‘ksaroyda bo‘lib o‘tgan tadbirdan lavhalar taqdim etildi