Mana hash-pash deguncha qish ham nihoyasiga yetib qoldi. Ammo qahrini oxirgi haftaga atab qo‘ygani “qishning bir kuni qolsa ham qo‘rq” degan o‘gitni tasdiqlaydi. O‘rtoqlar, qishning iliganiga ishonib qolmang, hali muddati oxiriga yetmadi.
Bu hafta qattiq sovuq bilan kirib keldi. Respublika bo‘yicha kuchli shamol kelib, yomg‘ir yog‘di. Qamchiq dovonidan qor urib bergani sababli fojia sodir bo‘ldi: ikki mashina handaqqa tushib ketdi. Samarqand va Qashqadaryoni bog‘lovchi Taxtaqoracha dovonida kuchli qor yog‘gani sababli avtomobillar harakati to‘xtatildi. Toshkent shahrida esa dastavval yomg‘ir, keyin qor yog‘ib berdi. Noqulay ob-havo sharoiti sababli 25-fevral sanasidagi Toshkentdan qatnaydigan barcha shaharlararo avtobus qatnovlari bekor qilindi. Sovuq havo doimgidek gaz quyish shoxobchalarini ham bo‘g‘ib qo‘ydi: gaz quyish vaqtiga cheklov o‘rnatildi.
Yanvar oyi oxiri va fevral oyi o‘rtalarida kuzatilgan anomal issiq ob-havo mevali daraxtlarning erta gullashiga sabab bo‘ldi. Biroq ob-havo keskin sovib, qor yog‘ishi tufayli mevali daraxtlar kurtaklari va gullari xavf ostida qoldi. Bu meva hosiliga salbiy ta’sir ko‘rsatishi hisoblab chiqildi. Bog‘bonlar gilos, o‘rik, uzum va bodom hosilidagi yo‘qotishlarni 30 foizdan 80 foizgacha baholamoqda. Bu ularning narxiga ham ta’sir qilishi mumkin.
Telegram-kanallarda mashinasining tasmasini almashtirgunicha qulog‘i muzlab qolgan qozog‘istonlik haydovchining videosi tarqaldi. Darhaqiqat, shimoldagi qo‘shnilarimiz sovuqdan yanada qattiq aziyat chekdi. Bizda esa doimgidek elektr va gaz uzilishlari yuz berdi, ammo odamlar o‘rganib ketgani uchunmi yoki “qish oxirlab qoldi-ku”, dedimi – harqalay bu gal ko‘chaga chiqishlar kuzatilmadi.
* * *
Hafta boshidayoq Toshkentda koronavirus vaksinasini tashishga mo‘ljallangan maxsus avtomobillar avariya sodir qildi. Oldindagi Changan miniveni keskin tormozlanishi bilan orqadagilar ham keskin tormozlangan va oqibatda bir-biriga urilib ketgan.
Sog‘liqni saqlash vazirligi matbuot xizmatining yozishicha, 23-fevral kuni YuNISEF tomonidan Sanitariya-epidemiologik osoyishtalik va jamoat salomatligi xizmati uchun 17 ta muzlatkichli yuk mashinasi va 206 ta miniven Changan avtomobillari topshirilgan. Mashinalarning umumiy qiymati 2 million dollarni tashkil etadi. Ushbu mablag‘ Vaksinalar va immunizatsiya bo‘yicha global alyansi (GAVI) tomonidan sog‘liqni saqlash tizimini mukammallashtirish doirasida ajratilgan.
Koronavirusga qarshi emlash ketayotgan bo‘lsa-yu, emlangingiz kelmasa, nima bo‘ladi? Bosh vazir o‘rinbosari Behzod Musayevning aytishicha, hech nima bo‘lmaydi. O‘zbekistonda COVID-19 ga qarshi emlanishdan bosh tortganlarga hech qanday chora ko‘rilmaydi. Darvoqe, O‘zbekiston aholini koronavirusga qarshi ommaviy emlashda ikki xil — Rossiyaning Sputnik V hamda xitoy—o‘zbek hamkorligidagi ZF-UZ-Vac2001 vaksinalaridan foydalanishni rejalashtirmoqda.
* * *
Toshkent viloyatida 2025-yilda bo‘lib o‘tadigan Osiyo o‘yinlari uchun Olimpiya shaharchasi quriladi. Bunday nufuzli musobaqaga tayyorgarlik ishlari bugundan boshlanadi.
Toshkent viloyatining Qibray tumanida, “Toshkent-Sharqiy” aerodromi yaqinida 155 gektarlik bog‘ barpo etiladi. Uni ishlab chiqishda dunyo megapolislaridagi mashhur parklarning landshafti, qulayliklari o‘rganilgan. Bu bog‘ faqat daraxtzor, buta va gullardan iborat o‘ziga xos dendropark bo‘lishi ko‘zda tutilgan. Bu poytaxt ekologiyasiga katta ta’sir ko‘rsatadigan, aholi va mehmonlar sayr qiladigan “yashil hudud” bo‘ladi. Mazkur bog‘ning yonida Olimpiya shaharchasi qurilishi rejalashtirilmoqda.
Ma’lumki, Osiyo Olimpiya kengashining qaroriga ko‘ra, 2025-yilda yoshlar o‘rtasidagi Osiyo o‘yinlari Toshkentda o‘tkaziladi. Unda qit’adagi 45 ta mamlakat yoshlari 20 ga yaqin sport turi bo‘yicha bellashadi.
Chirchiq daryosining 5 kilometrdan ziyod qismida qirg‘oqlarni tartibga keltirib, eshkak eshish bo‘yicha musobaqalar uchun zarur sharoit yaratiladi. Qibray tumanining ushbu hududida 2 ta universitet, shifoxona, ekspo, savdo va ko‘ngilochar markaz binolari joylashtirilishi nazarda tutilmoqda.
* * *
O‘tgan hafta prezident Namanganga borganida nochor mahallalardan biriga kirib, oqlanmagan va nurab qolgan devorni ko‘rsatib Namangan mas’ullariga tanbeh bergan edi. Hammasi shu oqlanmagan devordan boshlandi. Shundan keyin Namangan viloyati hokimi Shavkatjon Abdurazzoqov shu mahallaga ko‘chib kelib obodonlashtirishini e’lon qildi.
Namangan hokimi bu hafta rostdan ham shu mahallaga kelib o‘rnashishi aniq bo‘ldi. Unga tez fursatda konteynerdan uy qurildi. 3 sotix maydonni egallagan uy mahalla profilaktika inspektorining xizmat uyi qarshisida joylashdi. Bu yerda 12 metrli konteyner va fuqarolar qabuli uchun mo‘ljallangan ixcham shiypon o‘rnatilgan. Hokim bu shiyponchada fuqarolarni qabul qiladi. Qiziquvchan blogerlar bu vaqtinchalik konteyner-uyga qancha mablag‘ ketganini hisoblashga ham urinib ko‘rdi.
Dayjestimiz nihoyasiga yetdi. “Daryo”da qoling. Dunyo va O‘zbekistondagi voqealardan eng birinchi xabardor bo‘ling.
Izoh (0)