Shavkat Mirziyoyev 1-mart, dushanba kuni Sirdaryo viloyatining investitsiya loyihalari taqdimoti bilan tanishdi, deya xabar qilmoqda Prezident matbuot xizmati.
Ma’lum qilinishicha, 2021-yil uchun mazkur viloyatda 737 ta loyiha shakllantirilgan. Ularning umumiy qiymati 25 trillion 500 milliard so‘m bo‘lib, shundan qariyb 900 million dollarini xorijiy investitsiyalar tashkil etadi. Loyihalar natijasida yiliga 11 trillion so‘mlik ishlab chiqarish quvvati, qariyb 36 ming ish o‘rni yaratish maqsad qilingan. Yangi korxonalar 326 million dollarlik mahsulot eksport qilish, 124 million dollarlik import o‘rnini bosish imkonini beradi. Loyihalarni shakllantirishda to‘qimachilik, qurilish materiallari, farmatsevtika va oziq-ovqat sanoati “drayver” sifatida belgilab olingan.
Qayd etilishicha, Sirdaryo viloyatida 200 ming tonnadan ziyod paxta yetishtiriladi. Davlat rahbarining qayta ishlashni chuqurlashtirish, xomashyoni qo‘shilgan qiymatli mahsulotga aylantirib sotishga qaratilgan siyosati natijasida bu boradagi ko‘rsatkichlar o‘sib bormoqda. Xususan, 2020-yilda viloyatda mahalliy xomashyodan trikotaj mato tayyorlash darajasi 70, kiyim-kechak ishlab chiqarish darajasi 75 foiz bo‘lgan bo‘lsa, 2021-yilda bularni 100 foizga yetkazish mo‘ljallangan.
Bunda to‘qimachilik sohasida amalga oshiriladigan 29 ta loyiha muhim o‘rin tutadi. Ularning samarasida qariyb 818 milliard so‘mlik ishlab chiqarish quvvati tashkil etilib, qo‘shilgan qiymat 2,5 barobar ortadi. 6 ming 600 dan ziyod ish o‘rni yaratiladi.
Qurilish materiallari sanoatida 16 ta loyiha rejalashtirilgan. Masalan, Yangiyer shahrida kafel, Sayxunobod tumanida gazoblok, Xovos tumanida gipsokarton ishlab chiqarish yo‘lga qo‘yiladi. Barcha korxonalarni 2021-yil ishga tushirib, 2 mingga yaqin kishining bandligini ta’minlash ko‘zda tutilgan.
Oziq-ovqat tarmog‘ida meva-sabzavotlarni qayta ishlash, mosh yetishtirib, eksport qilish, baliqchilik klasteri tashkil etish kabi 51 ta loyiha amalga oshirilishi rejalashtirilgan. Bularning natijasida bozorga arzon va sifatli mahsulotlar chiqarilib, narx-navo barqarorligiga hissa qo‘shiladi. 3 ming 500 ga yaqin kishining bandligi ta’minlanadi.
Qayd etilishicha, farmatsevtika sohasidagi 9 ta loyihaning ham samaradorligi yuqori. Guliston shahri va Sirdaryo tumanida foydalanishga topshiriladigan korxonalarda infuzion eritmalar, tabletkalar va boshqa tibbiy vositalar ishlab chiqariladi.
Davlat rahbari Mirzaobod tumanida Gujarat sanoat zonasini tashkil etish loyihasiga alohida ahamiyat qaratdi. Oliy darajadagi kelishuvlar natijasi bo‘lgan ushbu majmuada iqtisodiyot talab etayotgan muhim loyihalar joylashtirilmoqda. Xususan, u yerda tomchilatib sug‘orish va issiqxona jihozlari, qishloq xo‘jaligi texnikasi agregatlari va minitexnikalar, plastmassa buyumlar, trikotaj, oziq-ovqat mahsulotlari ishlab chiqaruvchi 8 ta korxona bo‘ladi. Ularda 1 ming 600 dan ziyod kishi ishlaydi. Yiliga 25 million dollarlik eksport imkoniyati yaratiladi.
Bugungi kunda mazkur sanoat zonasi uchun 40 gektar yer ajratilgan. Uni tashkil etishga 100 million dollar to‘g‘ridan to‘g‘ri xorijiy investitsiya jalb etilishi belgilangan. Korxonalar 2021—2023-yillarda birin-ketin ishga tushiriladi.
Prezident loyihalar ijrosida sifat va muddatga alohida e’tibor qaratish, import o‘rnini bosuvchi mahsulotlar ishlab chiqarishni ko‘paytirish yuzasidan ko‘rsatmalar berdi. Sirdaryo viloyatining Toshkent shahriga yaqinligi, temiryo‘l infratuzilmasidan foydalanib, logistikani rivojlantirish, qo‘shni davlatlar bilan hamkorlikni kengaytirish zarurligini ta’kidladi.
Taqdimotda, shuningdek, aholini kambag‘allikdan chiqarish, yoshlar va ayollar bandligini oshirish borasidagi ishlarga ham to‘xtalib o‘tildi.
Bundan avval Namangandagi Prezident tanqid qilgan mahallada ikkita kichik sanoat zonasi tashkil etilgani, Toshkent viloyatida 2025-yilda bo‘lib o‘tadigan Osiyo o‘yinlari uchun Olimpiya shaharchasi qurilishi hamda Shavkat Mirziyoyev raisligida qishloq va suv xo‘jaligi sohasida amalga oshiriladigan vazifalar yuzasidan videoselektor o‘tkazilgani haqida xabar berilgandi.
Izoh (0)