O‘zbekistonning Toshkent shahri yoshlar o‘rtasida 2025-yilgi Paraosiyo o‘yinlariga mezbonlik qiladi. Bu haqda Osiyo Paralimpiya qo‘mitasi (APC) prezidenti Majid Rashid ma’lum qilgan.
Ushbu musobaqani qabul qilish uchun bir necha davlat o‘z nomzodini qo‘ygan, biroq APC ijroqo‘mi Toshkent variantini tanlagan.
Avvalroq yoshlar o‘rtasidagi 2025-yilgi Osiyo o‘yinlari Toshkent shahrida o‘tkazilishi ma’lum bo‘lgandi. Shu munosabat bilan Toshkent shahri yonida Olimpiya shaharchasi barpo etilishi belgilangandi.
Shu tariqa Toshkent yoshlar o‘rtasida Osiyo o‘yinlari va Paraosiyo o‘yinlarini bir yilda hamda bir joyda qabul qilgan ilk shahar bo‘ladi. Bunga qadar musobaqalar bir hududda o‘tkazilmagandi.
Joriy yilning 2–6-dekabr kunlari Bahraynda yoshlar o‘rtasidagi Paraosiyo o‘yinlari bo‘lib o‘tadi. Yopilish marosimida O‘zbekiston Paraosiyo o‘yinlari bayrog‘ini qabul qilib oladi.
Izoh (0)