Rossiya Davlat dumasiga migrant bolalarni rus tilini bilishini tasdiqlovchi hujjatsiz maktablarga qabul qilishni taqiqlovchi qonun loyihasi kiritildi. Hujjat Rossiya parlamenti quyi palatasi saytida e’lon qilindi.
Qonun loyihasi bilan “Rossiya Federatsiyasida taʼlim to‘g‘risida”gi federal qonunga o‘zgartirishlar kiritiladi. O‘zgartirishlar xorijiy fuqarolar va fuqaroligi bo‘lmagan shaxslarning farzandlari maktabga kirishda ta’lim olish uchun yetarli darajada rus tilini bilish bo‘yicha test sinovidan o‘tishlari shart ekanini nazarda tutadi. Testdan o‘ta olmaganlar o‘qishga qo‘yilmaydi.
Hujjatda qayd etilishicha, sinov tartibi va uning mezonlari Rossiya Taʼlim vazirligi va Rosobrnadzor tomonidan belgilanishi kerak. Shu bilan birga, qonun loyihasida test sinovlari bepul amalga oshirilishi nazarda tutilgan.
Loyiha mualliflari ushbu qonun “taʼlim sifati bo‘yicha davlat kafolatlarini amalga oshirish”, shuningdek, “taʼlim jarayonidagi barcha ishtirokchilarining huquq va majburiyatlarini uyg‘unlashtirish” uchun zarur ekanligini tushuntirdi.
Deputatlar qonun loyihasini 10-dekabr kuni birinchi o‘qishda ko‘rib chiqishni rejalashtirmoqda, dedi hujjat mualliflaridan biri — Davlat dumasi spikeri Vyacheslav Volodin.
Tuzatishlar qabul qilinsa, qonun 2025-yil 1-apreldan kuchga kirishi kutilmoqda.
2024-yil mart oyida Crocus City Hallda Tojikistondan kelgan muhojirlar ayblangan teraktdan keyin Rossiya hukumati migratsiya siyosatini faol ravishda kuchaytira boshladi.
Cheklovlar sharoitida so‘rovlar shuni ko‘rsatdiki, muhojirlarni yollayotgan Rossiya kompaniyalarining yarmidan ko‘pi ishchilar yetishmasligiga duch kelmoqda. Kreml, shuningdek, keskin demografik vaziyat fonida Rossiya dinamik rivojlanish uchun mehnat muhojirlariga muhtoj ekanini qayd etdi.
Izoh (0)