AQSH Adliya vazirligi suddan Google kompaniyasini (Alphabet Inc.ga tegishli) kompaniyaning onlayn qidiruv bozorini noqonuniy monopoliyaga olgani uchun jazo sifatida Chrome brauzerini sotishga majburlashni so‘ramoqchi. Bu haqda Bloomberg xabar berdi.
Prokurorlar o‘z takliflarini 20-noyabr kuni Kolumbiya okrugi bo‘yicha AQSH okrug sudi federal sudyasi Amit Mehtaga taqdim etishni rejalashtirmoqda.
“Monopoliyaga qarshi idoralar Google Chrome’ni sotishini xohlashmoqda, chunki brauzer kompaniyaning qidiruv tizimi qo‘llaniladigan asosiy joy”, deydi agentlik suhbatdoshlari.
Bloomberg StatCounter veb-trafikni tahlil qilish xizmati ma’lumotlariga tayanib, Chrome brauzerini dunyodagi eng mashhur brauzer deb hisoblaydi, AQSHda u bozorning 61 foizini tashkil qiladi.
Manbalarga ko‘ra, AQSH rasmiylari Google’dan Android mobil operatsion tizimini sotish talab qilinishi mumkin bo‘lgan yanada qattiqroq variantdan voz kechgan.
Shu bilan birga, AQSH Adliya vazirligi Google’ni Android’ning boshqa mahsulotlari, jumladan, qidiruv va Google Play ilovalar do‘konidan ajratishni taklif qilishni rejalashtirmoqda. Vazirlik, shuningdek, kompaniyaga qidiruv tizimi natijalari va ma’lumotlarini litsenziyalashni tavsiya qilishni rejalashtirmoqda. Saytlarga Google sun’iy intellektiga o‘z kontentidan foydalanishni blokirovka qilish uchun ko‘proq vakolat berishga ruxsat berishi kutilmoqda.
Bloomberg‘ga ko‘ra, bu variantlarning barchasi departament va unga aloqador davlatlar oktyabr oyida taqdim etgan talablarning dastlabki ro‘yxatiga kiritilgan. Talablar orasida Google’ning boshqa texnologiya kompaniyalari bilan eksklyuziv shartnomalarini taqiqlash ham joy olgan.
Google kompaniyasining tartibga solish masalalari bo‘yicha vitse-prezidenti Li-Enn Malhollandning qayd etishicha, Adliya vazirligi “bu holatda huquqiy masalalardan ancha uzoqroq bo‘lgan radikal kun tartibini ilgari surishda davom etmoqda”. Uning so‘zlariga ko‘ra, hukumat “Amerika iste’molchilari, ishlab chiquvchilari va texnologiya rahbariyatiga eng zarur bo‘lgan paytda zarar yetkazmoqda”.
Adliya vazirligi mazkur masalaga izoh berishdan bosh tortgan.
Avgust oyida sudya Amit Mehta Google’ni onlayn qidiruv va matnli reklama bozorlarida monopolist deb topgan edi, chunki kompaniya mobil qurilmalar va brauzerlarda Google qidiruvini dominant qilish uchun Apple va Samsung kabi boshqa yirik texnologiya kompaniyalari bilan milliardlab dollarlik shartnomalar tuzgan.
Kompaniya mazkur qaror ustidan shikoyat qilmoqchi. Sudya kompaniya monopoliyaga qarshi qonunlarni buzishni to‘xtatish uchun qanday choralar ko‘rishi kerakligini ko‘rib chiqish uchun 2025-yil apreliga tinglovni tayinladi. Yakuniy qaror 2025-yilning avgustigacha qabul qilinishi rejalashtirilgan.
Izoh (0)