АҚШ Адлия вазирлиги суддан Google компаниясини (Alphabet Inc.га тегишли) компаниянинг онлайн қидирув бозорини ноқонуний монополияга олгани учун жазо сифатида Chrome браузерини сотишга мажбурлашни сўрамоқчи. Бу ҳақда Bloomberg хабар берди.
Прокурорлар ўз таклифларини 20 ноябрь куни Колумбия округи бўйича АҚШ округ суди федерал судьяси Амит Меҳтага тақдим этишни режалаштирмоқда.
“Монополияга қарши идоралар Google Chrome’ни сотишини хоҳлашмоқда, чунки браузер компаниянинг қидирув тизими қўлланиладиган асосий жой”, дейди агентлик суҳбатдошлари.
Bloomberg StatCounter веб-трафикни таҳлил қилиш хизмати маълумотларига таяниб, Chrome браузерини дунёдаги энг машҳур браузер деб ҳисоблайди, АҚШда у бозорнинг 61 фоизини ташкил қилади.
Манбаларга кўра, АҚШ расмийлари Google’дан Android мобил операцион тизимини сотиш талаб қилиниши мумкин бўлган янада қаттиқроқ вариантдан воз кечган.
Шу билан бирга, АҚШ Адлия вазирлиги Google’ни Android’нинг бошқа маҳсулотлари, жумладан, қидирув ва Google Play иловалар дўконидан ажратишни таклиф қилишни режалаштирмоқда. Вазирлик, шунингдек, компанияга қидирув тизими натижалари ва маълумотларини лицензиялашни тавсия қилишни режалаштирмоқда. Сайтларга Google сунъий интеллектига ўз контентидан фойдаланишни блокировка қилиш учун кўпроқ ваколат беришга рухсат бериши кутилмоқда.
Bloomberg’га кўра, бу вариантларнинг барчаси департамент ва унга алоқадор давлатлар октябрь ойида тақдим этган талабларнинг дастлабки рўйхатига киритилган. Талаблар орасида Google’нинг бошқа технология компаниялари билан эксклюзив шартномаларини тақиқлаш ҳам жой олган.
Google компаниясининг тартибга солиш масалалари бўйича вице-президенти Ли-Энн Малҳолланднинг қайд этишича, Адлия вазирлиги “бу ҳолатда ҳуқуқий масалалардан анча узоқроқ бўлган радикал кун тартибини илгари суришда давом этмоқда”. Унинг сўзларига кўра, ҳукумат “Америка истеъмолчилари, ишлаб чиқувчилари ва технология раҳбариятига энг зарур бўлган пайтда зарар етказмоқда”.
Адлия вазирлиги мазкур масалага изоҳ беришдан бош тортган.
Август ойида судья Амит Меҳта Google’ни онлайн қидирув ва матнли реклама бозорларида монополист деб топган эди, чунки компания мобил қурилмалар ва браузерларда Google қидирувини доминант қилиш учун Apple ва Samsung каби бошқа йирик технология компаниялари билан миллиардлаб долларлик шартномалар тузган.
Компания мазкур қарор устидан шикоят қилмоқчи. Судья компания монополияга қарши қонунларни бузишни тўхтатиш учун қандай чоралар кўриши кераклигини кўриб чиқиш учун 2025 йил апрелига тингловни тайинлади. Якуний қарор 2025 йилнинг августигача қабул қилиниши режалаштирилган.
Изоҳ (0)