Piskentdagi avtopoligonda import avtomobillarni sinovdan o‘tkazish uchun navbat yuzaga keldi. “Daryo” ijodiy jamoasi voqea joyida bo‘lib, holat sabablarini o‘rgandi.
“Toshkent viloyati Piskent tumanidagi avtopoligonda sinov laborator majmuasini tashkil qildik. Ushbu laboratoriyani tashkil etishdan maqsad avvalo xorijiy davlatlardan kirib kelayotgan yengil avtomobillarning xavfsizligini ta’minlashdan iborat. Har xil yomon holatlarni keltirib chiqarmaslik va xalqimizga xavfsiz avtomobillardan foydalanish imkoniyatini yaratish niyatidamiz”, deydi O‘zbekistonda texnik jihatdan tartibga solish agentligi huzuridagi ilmiy sinov-sifat nazorat markazi sinov majmuasi boshlig‘i Azizjon Hakimov.
Mas’ulning bildirishicha, majmua 2021-yilda yengil avtomobillar uchun ishga tushirilgan.
“Ilgari har bir shaxs olib kelgan avtomobillar bojxonada ko‘rikdan o‘tkazilgan. Hozirga kelib o‘zida elektr magnit mavjud bo‘lgan avtomobillarga nisbatan ko‘plab savollar paydo bo‘lmoqda. Shu bois joriy yilning 1-noyabridan elektr magnit masalasida tekshiruv majburiy bo‘lib qoldi. Ushbu majmuadagi navbatlar yangi tashkil etilgan bo‘lganimiz sababli paydo bo‘ldi. Hozir esa hammasi iziga tushdi. Hamma o‘z navbatida kelib sinovdan o‘tkazib olishi mumkin”, deydi mas’ul.
Mas’ullarning bildirishicha, bunday sinov majmuasi voha va vodiy viloyatlarda ham bittadan tashkil etilib, Piskentdagi majmua bilan jami uchtaga yetkaziladi.
“Tashkilotimiz hozirda faqatgina bitta sinov majmuasiga ega. Chunki bu katta miqdorda mablag‘ talab qiladi. Shu sababli vodiy va vohada sinov komplekslarini qurish rejalashtirilgan. Piskentdagi majmuamizda bir kunda ellikta avtomobilda sinov o‘tkazish imkoniyati bor. Shuningdek, kelgusida poligonni yanada kengaytirish rejalari haqida ham o‘ylab ko‘ryapmiz. Yaqinda qishloq xo‘jaligida ishlatiladigan traktorlar sinovdan o‘tkazila boshlandi. Shu traktorlar sinovdan o‘tkazilganda ikki-uchta traktorda kamchilik topildi. Ya’ni odam traktor ichida ketganida zararli omillar yuqoriligi ma’lum bo‘lgan. Shundan so‘ng Xitoydan mutaxassislar kelishdi. Mahsulotimiz sifatli, nima sababdan sizlar bunday holatga olib kelyapsizlar deyishdi. Sinovda ikki-uch marta qatnashib, mahsulot nomuvofiqligini bilishgach, tan olishdi”, deydi mas’ul.
Azizjon Hakimovning bildirishicha, sinov majmuasidagi birinchi garaj avtomobildagi elektr magnit muvozanatini aniqlaydi. Bu laboratoriya 5 million dollarga qurib bitkazilgan.
Ajablanarlisi va aynan bizga tushunarsiz bo‘lgani mazkur sinov majmuasining ichida avtomobillar ko‘rigi uchun qilingan ikkinchi garaj ichida aytarli hech qanday texnika yo‘q. Mas’ullar bu joyga olib kirilgan avtomobillarning gabariti o‘lchanishini ta’kidlamoqda. Biz kuzatgan holatga ko‘ra, bu yerda konditsionerlar ko‘rikdan o‘tkazilib, ularning sinovdan o‘tkazilishi amalga oshirilmoqda.
Darvoqe, majmua boshlig‘i elektromobillar egalarini ogohlikka chorlab, agar ularda yong‘in kuzatilsa o‘chirish imkoni yo‘qligini, shu bois O‘zbekistonning o‘nqir-cho‘nqir yo‘llarida batareyalarning bexosdan teshilib qolishi kabi holatlardan ogohlikka chaqirdi. Majmuada aynan shu kabi holatlarni tekshirish imkoniyati yaratilayotganini, qo‘shimcha texnika olib kelinganini aytdi.
“Hozirgi kunda elektromobillar ancha tejamkor, lekin elektr mashinani hovli ichkarisiga qo‘ymaslik kerak. Xavfsizlik uchun tashqariga qo‘yish tavsiya etiladi. Agar akkumulyator tagidan yong‘in kelib chiqsa bu avtomobilni o‘chirib bo‘lmaydi. Hatto ‘pojarniy’lar ham uni o‘chira olmaydi. Bu gaz ballon portlashidan ham xavfliroq. O‘zi yonib o‘chmaguncha o‘chirib bo‘lmaydi. Elektr mashinani har doim yetakchi dilerlardan sotib olish tavsiya qilinadi. Xalqimizni sarson qilishni noo‘rin deb bilamiz. O‘sha avtomobilni kim sotayotgan bo‘lsa, xavfsizlikni ta’minlab, sertifikat berishi lozim. Keyin yana bir holat borki, avtomobil sotilganidan keyin sinovdan o‘tmasligi, muvaffaqiyatsiz bo‘lib chiqishi mumkin. Shu uchun dilerlardan xarid qilish yaxshiroq. Sotib olinayotganda sertifikat bilan ta’minlangan bo‘lsa, ovoragarchilik bo‘lmaydi”, deydi mas’ul.
Piskentdagi poligonda ko‘rinish bergan import avtomobil egalariga ko‘ra, bunday sinovlar keraksiz va ular uchun bu behuda vaqt sarflash hisoblanadi. Yana bir tadbirkor esa avval muammo kuzatilganini, endilikda hammasi iziga tushganini ta’kidlamoqda.
“Bunaqa qilishning hojati yo‘qda, menimcha. Xitoydan chiqqanda bu avtomobillarning hammasi bu kabi sinovlardan o‘tib chiqarilgan. Xitoydan ‘texpasport’ va sertifikat bilan chiqadi-ku. Bu mashina hech qanday zarar qilmaydi. Bu tadbirkorlarni ovora qiladi”, deydi Nurkeldi Nurlan o‘g‘li.
Davron Rasulov ismli suhbatdosh esa holat boshida yomon bo‘lganini, endilikda sharoitlar yaratilib, barchasi iziga tushib ketganini aytmoqda.
“Boshida tushunmovchilik bo‘ldi. Sal navbatlar ko‘paydi. Mana endi joyiga tushib ketib yaxshi bo‘lib qoldi. Hozir mashinasini olib kelib sertifikatlamoqchi bo‘lganlar uchun yengilliklar yaratilmoqda. Navbat yo‘q, to‘g‘ri kirib kelyapmiz”, deydi u.
Izoh (0)