Tehrondagi Azod islom universiteti talabasi hijobni noto‘g‘ri o‘ragani uchun ta’qibga uchragach, kiyimlarini yechib, universitet hududida yurgandi. Shundan so‘ng politsiya xodimlari uni olib ketgandi. Eron ilm-fan vaziri qizning taqdiri haqida ma’lumot berdi.
Eronlik talaba Axu Daryaiy ruhiy kasalliklar shifoxonasiga majburiy davolanishga yuborilgan. Eron ilm-fan vaziri Husayn Simaiy Sarrafning so‘zlariga ko‘ra, Daryaiy hozirda oilasi ko‘magida davolanmoqda. Mustaqil manbalardan olingan ma’lumotlarga ko‘ra, ilgari talabaning ruhiyatida hech qanday muammo kuzatilmagan. Shunga qaramay, qiz kuchli ta’sir qiluvchi dorilar bilan davolanayotgani aytilmoqda.
Ayblov Islom Respublikasining ayol namoyishchilariga, ayniqsa, majburiy hijob qonunlariga qarshi chiquvchilarga nisbatan uzoq yillik taktikasini aks ettiradi, deb yozmoqda IranWire nashri.
Nashrning yozishicha, so‘nggi yillarda bir qator siyosiy va mafkuraviy mahbuslar ruhiy kasalxonalarga majburan yotqizilgan. Ularga harakat yoki nutqni izdan chiqaruvchi dori-darmonlar berilgan va ayrimlariga elektrokonvulsiv davolash usuli (elektroshok terapiya ham deyiladi) qo‘llangan.
Talaba qizning qo‘lga olinishi
Noyabr oyi boshida Tehronda hijobni noto‘g‘ri o‘ragani ortidan ta’qibga uchragach, ko‘chada yechinib yurgan talaba qiz qo‘lga olindi.
Ijtimoiy tarmoqlarda universitetning ilmiy-tadqiqot bo‘limi hovlisida ichki kiyimdagi qiz yurgani aks etgan video tarqaldi. Boshqa bir videoda bir necha erkak uni avtomobilga majburlab o‘tqazib, olib ketayotgani ko‘rsatilgan.
Qizni hibsga olish paytida kaltaklashgan, jumladan, boshini mashina eshigiga urishgan. Mashinaning shinalarida qon izlari ko‘ringan, deb yozgan Amir Kabir Newsletter talabalar nashri.
Eronda ayollar sochlarini ro‘mol ostiga yashirib, keng kiyim kiyishlari shart. Aprel oyidan boshlab Eron ko‘chalarida hijobni to‘g‘ri kiyishni nazorat qiluvchi “Basij” xodimlari soni sezilarli darajada oshgan. Universitetlar esa tashqi ko‘rinishi qoidalarga mos kelmaydigan talaba qizlarni darsga kiritmaslik uchun yuzni tanish texnologiyasidan foydalanmoqda.
Izoh (0)