Belarus prezidenti Aleksandr Lukashenko mamlakatda ekstremizmda ayblangan 31 kishini afv etdi. Bu haqda Belarus rahbari saytida xabar berildi.
Ikki nafar ayol va 29 nafar erkakka nisbatan afv etish qarori qabul qilingan. Qayd etilishicha, mahbuslarning 17 nafari surunkali kasallikka chalingan, uch nafari nogiron, 27 nafar mahkumning farzandi bor, ulardan yetti nafari ko‘p bolali oilalarning ota-onalari hisoblanadi.
“Mahkumlar sudlanganligi olib tashlanmagan holda asosiy jazodan ozod qilinadi. Ichki ishlar vazirligi ularning qonunga bo‘ysunishi ustidan nazoratni ta’minlaydi”, deyiladi xabarda.
Joriy yilda Lukashenko ekstremistik ayblovlar bilan sudlangan 100 dan ortiq kishini afv etdi.
Avvalroq Belarus yetakchisi 2020-yilgi prezidentlik saylovlarida mamlakatda hokimiyatini egallashga qaratilgan fitnada ishtirok etganlikda ayblangan muxolifat yetakchisi Mariya Kolesnikovani afv etish masalasini ko‘rib chiqayotgani haqida xabar berilgandi. U ayolning tegishli so‘rovi kelib tushsa, ko‘rib chiqishga va’da bergan.
Izoh (0)