Belarus muxolifati yetakchisi Svetlana Tixanovskaya mamlakat konstitutsiyasiga o‘zgartirish kiritish bo‘yicha fevral oyida o‘tkaziladigan referendumni tan olish niyatida emasligini va muxolifat tomonidan amaldor hamda kuch tuzilmalarini jalb etishga urinishini ma’lum qildi, deb xabar beradi “Korrespondent.net”.
Ta’kidlanishicha, siyosatchi o‘z fikrlarini “Belarusdagi demokratik kuchlarning keyingi yilga mo‘ljallangan rejalari” borasidagi onlayn muhokamada bildirib o‘tgan. U o‘z nutqini tugab borayotgan 2021-yildagi statistik ma’lumotlar bilan boshlagan.
“241 ta jamoat tashkilotlari va 40 ta OAV yopildi. Rejim tomonidan 4,5 mingdan ortiq siyosiy vajlarga oid jinoyat ishlari ochildi, 929 kishi siyosiy mahbus sifatida tan olindi”, — deydi Tixanovskaya.
Muxolifatchi 2022-yilda “demokratik” kuchlarning omadi ko‘proq kelishiga umid bildirgan. Tixanovskaya Aleksandr Lukashenko tomonidan fevral oyiga belgilangan Belarus konstitutsiyasini o‘zgartirish borasidagi referendumni tan olish niyatida emas, shuningdek, u muxolifat tomonidan amaldorlar va kuch tuzilmalarini jalb etishga urinadi.
“2022-yil yangidan birlashish, barqarorlikni o‘rnatish va demokratlashtirish jarayonini boshlash zarur bo‘lgan yilga aylanadi”, — deydi u.
Belarus muxolifatining boshqa rejalari orasida — samizdat (SSSRda adabiy asarlar, diniy va jurnalistik matnlarni norasmiy hamda senzurasiz tarqatish usullari) va mamlakatni tark etishga majbur bo‘lganlar bilan birdamlik platformalarini qo‘llab-quvvatlash ham bor.
Avvalroq Lukashenkoga Belarus konstitutsiyasining yangi tahriri taqdim etilgani, o‘zgartirishlarning mazmun-mohiyati davlat rahbari, parlament va hukumatning funksiya va vakolatlarini belgilovchi prezidentlik boshqaruvi shaklini saqlab qolishdan iboratligi to‘g‘risida xabar berilgandi. Parlamentning qonun chiqaruvchi funksiyasini to‘liq belgilash, uning nazorat va kadrlar vakolatlarini kengaytirish ko‘zda tutilgan. Bundan tashqari, hukumat vakolatlarini va uning ijro hokimiyati sohasida qarorlar qabul qilishdagi mustaqilligini kengaytirish taklif etilmoqda.
Izoh (0)