Беларусь президенти Александр Лукашенко мамлакатда экстремизмда айбланган 31 кишини афв этди. Бу ҳақда Беларусь раҳбари сайтида хабар берилди.
Икки нафар аёл ва 29 нафар эркакка нисбатан афв этиш қарори қабул қилинган. Қайд этилишича, маҳбусларнинг 17 нафари сурункали касалликка чалинган, уч нафари ногирон, 27 нафар маҳкумнинг фарзанди бор, улардан етти нафари кўп болали оилаларнинг ота-оналари ҳисобланади.
“Маҳкумлар судланганлиги олиб ташланмаган ҳолда асосий жазодан озод қилинади. Ички ишлар вазирлиги уларнинг қонунга бўйсуниши устидан назоратни таъминлайди”, дейилади хабарда.
Жорий йилда Лукашенко экстремистик айбловлар билан судланган 100 дан ортиқ кишини афв этди.
Аввалроқ Беларусь етакчиси 2020 йилги президентлик сайловларида мамлакатда ҳокимиятини эгаллашга қаратилган фитнада иштирок этганликда айбланган мухолифат етакчиси Мария Колесниковани афв этиш масаласини кўриб чиқаётгани ҳақида хабар берилганди. У аёлнинг тегишли сўрови келиб тушса, кўриб чиқишга ваъда берган.
Изоҳ (0)