Афсуски, ҳамма ҳам актёрнинг шахсиятини экрандаги образидан ажрата олмайди. Шу сабабли ёвуз ва ярамас ролларни ижро этган актёрлар реал ҳаётда шафқатсиз танқидга дучор бўлишади. Баъзилари эса бундай нафрат тўлқинига бардош беролмай, касбларини тарк этишга мажбур бўлади.
Жек Глисон — Жоффри Баратеон
“Тахтлар ўйини” сериалининг тўрт мавсуми давомида Жек Глисон ҳокимиятга ташна садист Жоффри Баратеон ролини шундай маҳорат билан ижро этдики, у бутун телевидение тарихидаги энг нафратланилган ёвузлардан бирига айланди. Мухлислар Глисонни Жоффридан ажрата олмаганлари сабабли истеъдодли актёр интернет орқали ҳужумларга ва таҳдидли хатларга дучор бўлди. Бу, чамаси, Глисонга қаттиқ таъсир кўрсатди, чунки сериалнинг 2014 йилдаги сўнгги эпизодидан кўп ўтмай, у актёрлик фаолиятини тарк этишини эълон қилди.
Томас Ф. Уилсон — Бифф Таннен
Томас Ф. Уилсон Майкл Ж. Фокс билан бирга 80 йиллардаги “Келажакка қайтиб” трилогиясида рол ўйнаганида кенг шуҳрат қозонди, бу эса баъзи мухлисларни Уилсонга салбий муносабатда бўлишга мажбур қилди. Актёр бир ролнинг асирига айлангани ва унинг обрўси актёрдан олдинда эканини тан олишга мажбур бўлди.
“Томошабинларда айнан мен фильмдаги Майкл Ж. Фоксга қўпол муносабатда бўлган даҳшатли одам эканлигим ҳақида таассурот пайдо бўлди”, дейди Томас.
Лина Ҳиди — Серсея Ланнистер
“Тахтлар ўйини” сериалидаги Серсея Ланнистер роли билан танилган Лина Ҳидига ҳам осон кечмади. Унинг қаҳрамони кинематография тарихидаги энг ёмон кўрилган қаҳрамонлардан бири бўлиб, бу актрисанинг ўзига ҳам таъсир қилмаслиги мумкин эмасди.
2012 йилда Ҳиди Сан-Диегода бўлиб ўтган Cоmic-Cоn фестивалида мухлислар уни шунчаки эътиборсиз қолдиришганини айтди:
“Сериалнинг энг севимли қаҳрамонлари бўлган Питер Динклеж ва Эмилия Кларк ўртасида ўтиргандим. Менга деярли эътибор беришмасди. Одамлар Питдан дастхат олиш учун китоблар беришар ва мен уларни лаънатламоқчи бўлгандек мендан нари кетишарди”.
Жеффри Дин Морган — Ниган
Жеффри Дин Морган ҳам “Мурдалар” сериалидаги роли туфайли экрандаги энг ёмон қаҳрамонлардан бирига айланди. У ҳам онлайн, ҳам шахсан мухлислар ғазабига дуч кела бошлади ва фильмдаги ҳамкасби Норман Ридус билан биргалигида уни нотаниш кекса аёл ёмон сўзлар билан сўкканини эслайди:
Биз кун бўйи мототциклда сайр қилдик, шаҳар четига келиб қолдик ва қаҳва ичиш учун тўхтадик. Ёши 80 ларда бўлган бир аёл машинамиз ёнига келиб, менга ўрта бармоғини кўрсатди ва “Жин урсин сени” деб сўкди.
Изоҳ (0)