Gollivudning Shon-sharaf xiyobonida Betmenning yulduzi o‘rnatiladi

Gollivudning Shon-sharaf xiyobonidagi yulduzlar “Oskar” yoki “Emmi” kabi nufuzli mukofotdir. Ko‘plab shou-biznes vakillari u yerda o‘z yulduziga ega bo‘lishni orzu qiladi. Yo‘laklardagi plitalarga o‘rnatilgan minglab yulduzlar san’at, kino, musiqa sanoatida o‘chmas iz qoldirgan aktyorlar, musiqachilar, prodyuserlar sharafiga qo‘yilgan. Ulardan biri endilikda o‘ylab topilgan qahramonga bag‘ishlanadi — tez orada Shon-sharaf xiyobonida Betman obrazi sharafiga yulduz o‘rnatiladi.

Gollivud tarixida boshqa hech qaysi super qahramon bunday e’tirof etilmagan. Betmen qahramoni sharafiga yulduz o‘rnatilishi hatto Ginnes rekordlari kitobiga kiritildi. Ushbu mukofot nafaqat komiks qahramoniga, balki uning mualliflaridan biri — animator va ssenariy muallifi Bob Keynga hamda 1960-yillarda Betmen rolini ijro etgan aktyor Adam Uestga ham bag‘ishlanadi. Qora ritsar yulduzi ularning yulduzlari yoniga qo‘yiladi.

“Gollivud Savdo palatasi Shon-sharaf xiyobonidagi birinchi superqahramon — birinchi va takrorlanmas Betmanni e’tirof etishdan faxrlanadi!”,  deydi prodyuser Ana Martines.

“Qariyb 85 yildan ortiq vaqt davomida Qora ritsar barcha muxlislar uchun qat’iyat, jasorat va adolat ramzi bo‘lib kelgan”, deya bu fikrni DC Studio qo‘llab-quvvatlanadi.

Betmen yulduzi Shon-sharaf xiyobonidagi 2790-raqam ostida bo‘ladi. Yulduzni o‘rnatish marosimi joriy yil 26-sentyabrga belgilangan.

Shon-sharaf xiyoboni Gollivud Savdo palatasi tomonidan boshqariladi va Hollywood Historic Trust tomonidan moliyalashtiriladi. Aynan Betmen qahramonini yulduz bilan mukofotlashga bir necha sabablar mavjud, jumladan, uning ishtirokidagi komikslar juda ko‘p bo‘lib, Betmen ishtirokida ko‘plab filmlar, animatsiyalar va kompyuter o‘yinlari ishlab chiqilgan. Bundan tashqari, uning rolini asosan “Oskar” mukofoti sovrindorlari — Ben Afflek, Kristian Beyl, Jorj Kluni kabi aktyorlar ijro etgan.