Mamlakatda joriy yil yanvar–sentyabr oylarida o‘rtacha oylik nominal hisoblangan ish haqi 5 million 151 ming so‘mga yetgan. Qator soha vakillari daromadi mazkur miqdordan ko‘p. Bu haqda Statistika agentligi eʼlon qilgan tahlilda keltirilgan.
O‘zbekistonda eng yuqori o‘rtacha oylik ish haqi kompyuter dasturlashtirish xizmatlari uchun to‘lanmoqda. To‘qqiz oy davomida mazkur soha egalari oyiga o‘rtacha 18 million so‘mdan ish haqi olgan.
Shu bilan birga, qayta sug‘urtalash va nafaqa jamg‘armalari (16,8 million so‘m), axborot xizmati (15,8 million so‘m) va moliyaviy xizmatlar ko‘rsatish (15,6 million so‘m) tarmoqlarida ish haqi nisbatan yuqori. Bank, sug‘urta, lizing, kredit va vositachilik faoliyati vakillarining o‘rtacha oylik ish haqi 14,5 million so‘m bo‘lgan.
Umuman olganda, tashish va saqlash (8,1 million so‘m), sanoat (6,3 million so‘m), savdo (6 million so‘m), qurilish (5,7 million so‘m) sohalarida o‘rtacha oylik ish haqi rasmiy ko‘rsatkichdan yuqori darajada qayd etilgan.
Yashash va ovqatlanish xizmatlari (4,7 million so‘m), taʼlim (3,5 million so‘m), sog‘liqni saqlash va ijtimoiy xizmatlar ko‘rsatish (3,3 million so‘m) sohalarida to‘lanayotgan o‘rtacha oylik rasmiy ko‘rsatkichdan pastligicha qolmoqda.
Hududlar bo‘yicha o‘rtacha oylik nominal hisoblangan ish haqining eng yuqori ko‘rsatkichi Toshkent shahri (8,7 million so‘m) va Navoiy viloyatida (6,6 million so‘m) qayd etilgan. Eng past o‘rtacha oyliklar Qashqadaryo (3,6 million so‘m) va Surxondaryoda (3,7 million so‘m) to‘langan.
Izoh (0)