Мамлакатда жорий йил январь–сентябрь ойларида ўртача ойлик номинал ҳисобланган иш ҳақи 5 миллион 151 минг сўмга етган. Қатор соҳа вакиллари даромади мазкур миқдордан кўп. Бу ҳақда Статистика агентлиги эълон қилган таҳлилда келтирилган.
Ўзбекистонда энг юқори ўртача ойлик иш ҳақи компьютер дастурлаштириш хизматлари учун тўланмоқда. Тўққиз ой давомида мазкур соҳа эгалари ойига ўртача 18 миллион сўмдан иш ҳақи олган.
Шу билан бирга, қайта суғурталаш ва нафақа жамғармалари (16,8 миллион сўм), ахборот хизмати (15,8 миллион сўм) ва молиявий хизматлар кўрсатиш (15,6 миллион сўм) тармоқларида иш ҳақи нисбатан юқори. Банк, суғурта, лизинг, кредит ва воситачилик фаолияти вакилларининг ўртача ойлик иш ҳақи 14,5 миллион сўм бўлган.
Умуман олганда, ташиш ва сақлаш (8,1 миллион сўм), саноат (6,3 миллион сўм), савдо (6 миллион сўм), қурилиш (5,7 миллион сўм) соҳаларида ўртача ойлик иш ҳақи расмий кўрсаткичдан юқори даражада қайд этилган.
Яшаш ва овқатланиш хизматлари (4,7 миллион сўм), таълим (3,5 миллион сўм), соғлиқни сақлаш ва ижтимоий хизматлар кўрсатиш (3,3 миллион сўм) соҳаларида тўланаётган ўртача ойлик расмий кўрсаткичдан пастлигича қолмоқда.
Ҳудудлар бўйича ўртача ойлик номинал ҳисобланган иш ҳақининг энг юқори кўрсаткичи Тошкент шаҳри (8,7 миллион сўм) ва Навоий вилоятида (6,6 миллион сўм) қайд этилган. Энг паст ўртача ойликлар Қашқадарё (3,6 миллион сўм) ва Сурхондарёда (3,7 миллион сўм) тўланган.
Изоҳ (0)