Singapurda ESG Business jurnali tomonidan ESG sohasida barqaror va innovatsion amaliyotlar hamda tashabbuslarni namoyish etgan tashkilotlar taqdirlandi. O‘zsanoatqurilishbank biryo‘la ikkita mukofotga sazovor bo‘ldi.
2019—2030-yillarga mo‘ljallangan O‘zbekiston Respublikasining “yashil” iqtisodiyotga o‘tish strategiyasi tashkilot va muassasalarda ESG tamoyillarini joriy etish ishlarini jadallashtirdi.
O‘zsanoatqurilishbank tomonidan ushbu tizim Xalqaro moliya korporatsiyasi bilan hamkorlikda joriy qilinib, uning asosida ishlab chiqarishning atrof-muhitga salbiy ta’sirini kamaytirishga, energiya samaradorlikni ta’minlashga, tabiiy resurslarni tejash va uglerod chiqindilarini minimallashtirishga erishilmoqda.
ESG Business jurnalining nufuzli tadbiri davomida O‘zsanoatqurilishbankning ushbu yo‘nalishdagi faoliyati alohida e’tirof etilib, muassasa ko‘magida ishga tushirilgan 2 ta loyihaga maxsus mukofotlar taqdim etildi.
Jumladan, O‘zbekistonda qayta tiklanuvchi energiya manbalarini joriy etganlik uchun mukofot neft va gaz sohasiga oid loyiha uchun berilgan bo‘lsa, mamlakat sanoatida energiya samaradorligini ta’minlaganlik uchun mukofotga qurilish materiallari ishlab chiqarish tarmog‘idagi loyiha munosib ko‘rildi.
Taqdirlash marosimida bankning ESG tamoyillari asosidagi faoliyati tabiiy resurslarni tejash va ekologik barqarorlikni ta’minlash bilan bir qatorda ilg‘or texnologiyalarni faol o‘zlashtirish, mahsulot tannarxini pasaytirish, yangi ish o‘rinlarini yaratib, ishchi-xodimlar uchun raqobatbardosh ish haqi taklif etish kabi muhim ijtimoiy-iqtisodiy masalalarga yechimiga xizmat qilishi ta’kidlandi.
Reklama huquqi asosida.
Izoh (0)