Amerikalik biznesmen Ilon Mask bloger Leks Fridmanning podkasti efirida Ukraina prezidenti Vladimir Zelenskiyga yoshlarni o‘limga yubormaslikni maslahat berdi.
![](/static/2023/12121/photo_2023-11-11_10-07-09.jpg)
Podkast davomida Fridman Maskdan “Zelenskiy Rossiya prezidenti Vladimir Putin bilan muzokaralar stoliga o‘tirishi kerakmi?”, deya savol bergan.
“Ha. Men unga ukrain yoshlarini okoplarda o‘lishga yubormaslikni maslahat beraman. Putin bilan dialog o‘rnatish yoki o‘rnatmaslikdan qat’i nazar, buni qilmaslik kerak”, — deydi Mask.
Biznesmen Ukrainadagi jangovar harakatlarni Birinchi jahon urushi bilan qiyoslagan. Maskning fikricha, frontdagi vaziyat shunday holatga kelganki, hujum ko‘plab qurbonlarga olib keladi.
Prezident Vladimir Putin Rossiya muzokaralarga tayyor ekanini bildirib, biroq Ukraina hukumati ularga taqiq qo‘yganini eslatib o‘tgan. Tashqi ishlar vaziri Sergey Lavrov Kiyevga Moskva bilan muzokara o‘tkazishni G‘arb davlatlari taqiqlagan degan fikrni bildirgan.
Avvalroq Ukraina Oliy Radasi prezident Vladimir Zelenskiy tomonidan kiritilgan mamlakatdagi harbiy holat va umumiy safarbarlikni yana 90 kunga — 2024-yil 14-fevralgacha uzaytirish to‘g‘risidagi qonun loyihalarini qabul qilgandi.