Checheniston rahbari Ramzan Qodirov unga berilgan Cybertruck masofadan turib o‘chirib qo‘yilgani va elektr pikapni tortib ketishga to‘g‘ri kelganini aytdi. Bu haqda u o‘zining Telegram kanalida ma’lum qildi.
Ilon Mask xunuk ish qildi. Chin dildan qimmatbaho sovg‘alar beradi-yu, keyin ularni masofadan o‘chirib qo‘yadi, deb yozadi Qodirov.
Checheniston rahbari gap unga sovg‘a qilingan Cybertruck haqida ketayotganini aytdi. Ramzan Qodirov pulemyot o‘rnatilgan mazkur pikap urushga yuborilganini ta’kidlagan.
Ramzan Qodirov 17-avgust kuni Telegram kanalida pulemyot o‘rnatilgan Cybertruck videosini e’lon qildi. U elektr pikapni shaxsan sinovdan o‘tkazib, u urushga yuborilishini aytdi.
“Ilon, rahmat! Grozniyga keling, sizni eng aziz mehmonim sifatida qabul qilaman! Bizning Rossiya TIV bunday sayohatga qarshi bo‘ladi deb o‘ylamayman. Va, albatta, biz sizning yangi ishlanmalaringizni kutamiz”, degan edi Qodirov.
Ilon Mask bunga javoban X ijtimoiy tarmog‘ida Qodirovga hech qanday avtomobil sovg‘a qilmaganini bildirdi.
Siz shunchalik qoloqmisiz, men rus generaliga Cybertruck berdim deb o‘ylaysizmi? Bu hayratlanarli, deb yozgan Tesla rahbari.
Maskning Qodirovga javobi e’lon qilingandan biroz o‘tib, Checheniston rahbari yana Tesla asoschisiga murojaat qilgandi:
Ilon, qoloq odamlarga va sotqin ommaviy axborot vositalariga e’tibor bermang. Ular bilan chalg‘imasligingiz kerak, ishoning. Yangi cho‘qqilarni zabt etishda davom eting. Sizning ishlanmalaringiz bizga katta yordam bermoqda!, degan u.
Izoh (0)