Rossiya Eron vositachiligida Yaman shimolida hukmronlik qiluvchi “Ansor Alloh” harakati (husiylar) bilan kemaga qarshi P-800 qanotli raketalarini yetkazib berish bo‘yicha yashirin muzokaralar olib bormoqda. Bu haqda tegishli manbalarga tayanib Reuters xabar berdi.
Nashr suhbatdoshlariga ko‘ra, muzokaralar Eronning sobiq prezidenti Ibrohim Raisiy davrida boshlangan. Ikki mintaqaviy rasmiyning aytishicha, Rossiya va husiy vakillari Tehronda bu yil kamida ikki marta uchrashgan, kelgusi haftalarda yana uchrashuvlar bo‘lishi kutilmoqda. Biroq Reuters manbalariga ko‘ra, Rossiya hozircha raketalarni husiylarga topshirish bo‘yicha qaror qabul qilgani yo‘q.
“Eronliklar bu muzokaralarda vositachilik qilmoqda, biroq ularga qo‘shilishni istamayapti”, dedi G‘arb razvedkasidagi manba.
Mutaxassislarning taʼkidlashicha, 300 km gacha uchish masofasiga ega bo‘lgan Rossiyaning P-800 Oniks raketalari husiylarga Qizil dengizdagi tijorat kemalarini aniqroq urish imkonini beradi hamda AQSH va Yevropa harbiy kemalariga tahdidni oshiradi.
Manbalarga ko‘ra, husiylarga raketa yetkazib berish qarori Ukrainaga Rossiya ichidagi nishonlarga uzoq masofali qurollardan o‘q otish imkoniyatini muhokama qilayotgan G‘arb davlatlarining pozitsiyasi bilan bog‘liq bo‘lishi mumkin.
Amerika rasmiysiga ko‘ra, AQSH delegatsiyasi Saudiya Arabistonidagi hamkasblari bilan Rossiya va husiylar o‘rtasidagi taklif qilingan muzokaralarni muhokama qilgan. Agentlikning uch nafar suhbatdoshi saudiyaliklar Rossiya vakillariga raketa yetkazib berish bo‘yicha AQSH xavotirlarini yetkazgan.
Husiy vakili Muhammad Abdul-Salam jurnalistlarning raketa muzokaralari haqidagi savoliga javoban bu haqda hech qanday tasavvurga ega emasligini aytgan.
Avvalroq Rossiya prezidenti Vladimir Putin G‘arbning Ukrainaga qurol yetkazib berishiga javoban Moskva boshqa davlatlarni G‘arb nishonlariga hujum qilish uchun qurol bilan ta’minlashga haqli ekanini ma’lum qilgan edi.
Izoh (0)