1994-yil 14-oktyabrda Frensis Darabont rejissyorlik qilgan “Shoushenkdan qochish” filmi jahon ekranlariga chiqdi. Bu umidsizlikda yashashni istamaydigan insonlar haqidagi samimiy bir hikoya. Ushbu sevimli filmning 30 yilligiga bag‘ishlab, uning yaratilishi jarayoniga oid 10 ta qiziqarli faktni e’tiboringizga havola qilamiz.
“Shoushenkdan qochish”ni Rob Rayner suratga olishi mumkin edi
Film ustida bevosita ish boshlanmasidan oldin Frensis Darabont Rob Raynerdan juda yaxshi taklif oladi — “Shoushenkdan qochish”ni ekranlashtirish huquqi uchun 2,5 million dollar. O‘sha paytda Darabont karyerasini endigina boshlayotgan edi, Rayner esa kinosanoatda katta mavqega ega bo‘lgan.
Rayner Endi va Red rollariga Tom Kruz hamda Garison Fordni olishni xohlagan. Baxtga qarshi Darabont ushbu taklifni rad etadi, bu qarorini “Shoushenkdan qochish” — uning buyuk ish qilishi uchun noyob imkoniyat” deb tushuntiradi va u haq bo‘lib chiqdi.
Klint Istvud Red roliga kasting topshirgan
Stiven King hikoyasida Red “o‘rta yoshlardagi, sochlari oqargan, mallasoch irland” sifatida tasvirlangan. Dastlab kino ijodkorlar kasting jarayonida tasvirlangan obrazni yaratishni rejalashtirgan. Endi Dyufreynga o‘xshash yevropacha ko‘rinishga ega yuzlab erkaklar, jumladan, mashhur aktyorlar Pol Nyuman, Robert Redford, Garison Ford va hatto Klint Istvud ham ko‘rib chiqilgan.
Biroq Frensis Darabont har doim Red obrazida faqat Morgan Frimanni ko‘rgan. Rejissyorga Frimannning tabiiyligi yoqqan: uning yurish va gapirish uslubining samimiyligi obraziga juda mos keladi.
Film jahon kinoteatrlarida muvaffaqiyatsizlikka uchragan
Hozirda “Shoushenkdan qochish” o‘lmas klassika sifatida tan olinadi. Biroq 1994-yilda film jahon kinoteatrlarida yaxshi natija ko‘rsata olmaydi va muvaffaqiyatsiz deb topiladi. 25 million dollarlik byudjetga ega bo‘lgan holda, u bor-yo‘g‘i 18 million dollar yig‘oladi: sodda qilib aytganda, film sarflangan mablag‘larni ham qoplab bera olmaydi. Bir qator “Oskar” nominatsiyalaridan so‘ng, kartina yana 10 million dollar daromad oladi, ammo bu ham filmni daromadli deb hisoblash uchun yetarli bo‘lmaydi.
Filmning haqiqiy muvaffaqiyati televideniye, aniqrog‘i, Castle Rock studiyasini sotib olgan va “Shoushenkdan qochish”ni translyatsiya qilish huquqini litsenziyalagan TNT kanali tufayli keladi. Warner Home Video butun mamlakat bo‘ylab “Shoushenkdan qochish”ning 320 ming nusxasi sotiladi, bu o‘sha yil uchun rekord ko‘rsatkich edi.
Hayvonlarni himoya qiluvchilar suratga olish guruhiga lichinkalarni o‘ldirishni taqiqlagan
Film syujetiga ko‘ra, kutubxonachi qariya Bruks (Jeyms Uitmor) qarg‘a boqib oladi va uni vaqt-vaqti bilan lichinkalar bilan oziqlantiradi. Qushni boqish sahnasini suratga olish uchun ijodiy guruh ancha qiyinchiliklarga duch keladi. AQSHda barcha tirik mavjudotlar ishtirokidagi sahnalar hayvon huquqlarini himoya qiluvchi tashkilotlar tomonidan qat’iy nazorat qilinadi.
“Shoushenkdan qochish” suratga olish maydonchasida hozir bo‘lgan faollar qarg‘a yeydigan lichinkalarni o‘ldirishni taqiqlashadi. Natijada Darabont va ijodiy jamoa qarg‘ani boqish uchun tabiiy ravishda o‘lgan lichinkalarni topishga majbur bo‘ladi.
Morgan Frimanning o‘g‘li yosh Red rolini o‘ynagan
Redning shartli ravishda ozodlikka chiqarilishi haqidagi hujjatlarga yopishtirilgan suratlar Morgan Frimanning yoshlikdagi fotosuratlari emas. Bu fotosuratlar uning o‘g‘li Alfonso Frimanga tegishli. Ma’lum bo‘lishicha, Devid Fincherning “Yetti” trillerida ham u daktiloskopiya mutaxassisi rolini o‘ynagan.
Filmning bir sahnasi 9 soatdan ko‘proq suratga olingan
Ishonish qiyin, lekin Endi va Red birinchi marta suhbatlashadigan sahna to‘qqiz soatdan ortiq suratga olingan. Ko‘rinishidan, kadrda hech qanday favqulodda narsa sodir bo‘lmaydi: bir erkak turib gapiradi, ikkinchisi esa beyzbol to‘pini uloqtiradi. Biroq Darabont olingan dubllardan hech birini yoqtirmaydi va Friman to‘qqiz soat davomida deyarli tanaffussiz to‘p o‘ynashga majbur bo‘ladi. Aktyor shikoyat qilmagan bo‘lsa-da, bu jarayon unga qiyinchilik tug‘diradi — yelkasidagi paylar cho‘zilgani uchun ertasi kuni Friman qo‘lini bog‘lab keladi.
“Shoushenkdan qochish” filmida Frensis Darabontning qo‘l va oyoqlarini ko‘rish mumkin
Hamma Endi Dyufreyn rolini Tim Robbins ijro etganini biladi. Ammo personaj ishtirok etgan barcha sahnalar aslida uniki emas. Dyufreynning qo‘l va oyoqlari yaqin planda ko‘rsatilgan sahnalarda aslida rejissyor Frensis Darabontning qo‘l-oyoqlari namoyish etilgan. Masalan, Endi miltiqni o‘qlayotgan yoki qamoqxona devorida o‘z ismini o‘yayotgan sahnalarda ham. Ushbu sahnalar Darabont tomonidan “Shoushenkdan qochish”ning suratga olish ishlaridan keyingi bosqichida qo‘shilgan.
Qochish sahnasida haqiqiy go‘ng ishlatilgan
Ko‘pchilik Endi Dyufreynning kanalizatsiya orqali emaklab, uzoq kutilgan ozodlik sari harakat qilgan sahnasini yaxshi eslaydi. Dyufreyn rolini ijro etgan Tim Robbinsning intervyularidan birida u aynan shu sahnada qiynalganini tan olgan, chunki filmda soxta emas, balki haqiqiy qoramol go‘ngi ishlatilgan. Suratga olish maydonchasida juda kuchli hid tarqalgan, aktyor hatto zaharlanishdan juda qo‘rqqan.
Film AQSH iqtisodiyotini ko‘targan
Garchi film dunyo bo‘ylab muvaffaqiyat qozonmagan bo‘lsa-da, “Shoushenkdan qochish” AQSH iqtisodiyotiga sezilarli hissa qo‘shadi. Suratga olish ishlari Ogayo shtatining uchta shahrida bo‘lib o‘tgan: Mensfild, Eshlend va Apper-Sandaski. Filmda ko‘rsatilgan 13 lokatsiya ushbu uchta mintaqaga bo‘lingan. Keyinchalik, bu joylar “Shoushenkdan qochish”ning millionlab muxlislari uchun mashhur turistik yo‘nalishlarga aylandi. Kongress va turizm ishlari byurosi ma’lumotlariga ko‘ra, film chiqishi bilan Mensfild, Eshlend va Apper-Sandaskiga 20 mingdan ortiq turist tashrif buyurgan va ular davlat byudjetiga uch million dollardan ko‘proq daromad keltirgan.
Izoh (0)