Navoiy viloyatining Tomdi tumanida 500 MVt quvvatli shamol elektr stansiyasini qurish loyihasi doirasida birinchi shamol turbinasi qurib bitkazildi. Bu haqda 13-iyun kuni Energetika vazirligi tomonidan o‘tkazilgan press-turda maʼlum qilindi, deya xabar bermoqda “Daryo” muxbiri.
Birlashgan Arab Amirliklarining “Masdar” kompaniyasi tomonidan barpo etilayotgan mazkur yirik loyiha doirasida “Goldwind” kompaniyasining (Xitoy Xalq Respublikasi) birinchi 4,7 MVt quvvatli shamol turbinasi o‘rnatildi. Uning balandligi 97 metr, shamol parraklarining har biri esa 77 metrni tashkil qiladi.
Energetika vazirligi departamenti direktori Abdullajon Otaboyevning taʼkidlashicha, mazkur loyiha doirasida jami 111 ta shamol turbinasi o‘rnatiladi.
“Ushbu stansiyasiyaning ilk quvvatlari joriy yil yakunida ishga tushiriladi hamda Markaziy Osiyodagi eng yirik shamol elektr stansiyasidir. Stansiya to‘liq ishga tushirilgach, yiliga 1 mlrd 800 mln kVt/soat elektr energiyasi ishlab chiqariladi. Buning natijasida yiliga 540 mln kub metr tabiiy gaz tejalishiga erishilib, atmosferaga 720 ming tonna zararli gazlar chiqishining oldi olinadi”, — dedi Abdullajon Otaboyev.
Uning qo‘shimcha qilishicha, loyiha to‘liq ishga tushsa, yarim million xonadon elektr energiyasi bilan taʼminlanadi.
Maʼlumot uchun, Tomdi tumanidagi SHES Prezidentimizning 2020-yil dekabrdagi “Navoiy viloyatida quvvati 500 MVt bo‘lgan shamol elektr stansiyasini qurish investitsiya loyihasini amalga oshirish chora-tadbirlari to‘g‘risida”gi qarori asosida amalga oshirilmoqda.
Izoh (0)