“Elektr sarfi oylik hisoblanadi” — kuniga 6,6 kilovattdan ko‘p sarflangan tok uchun qimmat narx belgilangani rad etildi

Telegram kanallarda elektr energiyasi uchun yangi joriy etilgan o‘suvchan oylik tariflar kunlik isteʼmol uchun alohida tarzda amal qilayotgani haqida xabar tarqaldi. Unda kunlik sarfi 6,6 kVt/soatdan oshgan tok uchun qimmat narxda to‘lov qilinishi aytilgan. “Hududiy elektr tarmoqlari” AJ mazkur xabar asossiz ekanini maʼlum qildi.

2024-yil 1-maydan O‘zbekiston aholisi uchun elektr energiyasi va tabiiy gaz narxlariga oylik ijtimoiy norma joriy etildi. Xususan, bir oyda 200 kVt/soatgacha sarflangan elektr energiyasi to‘lovi 450 so‘mdan (1 kilovattga), undan oshgan qismiga o‘suvchan tariflarda to‘lov qilinishi belgilandi.

Bugun, 10-iyun kuni ijtimoiy tarmoqlarda kunlik 6,6 kilovattdan ko‘p foydalanilgan elektr energiyasi uchun qimmat narxda to‘lov qilishga to‘g‘ri kelayotgani haqida xabarlar tarqaldi. “Hududiy elektr tarmoqlari” AJ bunga rasmiy munosabat bildirdi.

Maʼlum qilinishicha, mazkur xabar asossiz bo‘lib, ijtimoiy norma oylik ko‘rsatkichlarga muvofiq amal qiladi.

“Bir oyda 200 kilovattgacha elektr energiyasi ishlatgan xonadon egasi 1 kilovatt soat uchun 450 so‘mdan to‘laydi. Isteʼmol mazkur ko‘rsatkichdan oshsa, yaʼni 1000 kilovatt soatgacha ishlatilgan bo‘lsa, 200 kilovatt soatgacha — 450 so‘m, qolgan 800 kilovatt soatga — 900 so‘mdan to‘lov qilinadi. Mazkur o‘suvchi tariflarni hisoblashda hamda xabarda keltirilganidek, elektr energiyasi sarfi kunlik isteʼmol miqdorida emas, balki isteʼmolchining bir oy davomidagi ko‘rsatkichi asosida hisoblanishini maʼlum qilamiz”, — deyiladi manbada.

Misol keltirilishicha, isteʼmolchi bir oyda 300 kilovattgacha elektr energiyasi ishlatgan bo‘lsa, xonadon egasi 200 kilovattga 1 kilovatt soat uchun — 450 so‘m, qolgan 100 kilovatt soat uchun 900 so‘mdan to‘laydi. 2024-yil 1-iyundan isteʼmolchilarga foydalanilgan elektr energiyasi va tabiiy gaz bo‘yicha oylik maʼlumot “bazaviy meyor” va undan ortiq hajmlar kesimida yuboriladi.

Ijtimoiy tarmoqlarda tarqatilayotgan “...kuniga 6,6 kVtdan ortiq tok ishlatsangiz, undan ortganiga qimmat tarifda to‘lanadi”, degan xabarlar mutlaqo asossiz ekanligini taʼkidlagan holda, yangilik kanallari adminlaridan bunday yolg‘on maʼlumotlarni tarqatmasliklarini so‘rab qolamiz. “Hududiy elektr tarmoqlari” AJ mazkur tarqatilgan asossiz maʼlumot yuzasidan tegishli tartibda huquqni muhofaza qilish organlariga murojaat qilishini maʼlum qiladi, — deyilgan tashkilot munosabatida.

Avvalroq energetika vaziri Jo‘rabek Mirzamahmudov nega aynan ijtimoiy norma 200 kVt/soat etib belgilanganiga izoh bergandi.

Aprel oyida asosiy isteʼmolchilarning 73 foizi 200 kVt/soatdan kam elektr ishlatgan. Qish oylarida ham 66–68 foiz abonent 200 kVt/soatgacha elektr ishlatgan. Hisob-kitoblarimizga ko‘ra, 200 kVt/soat bazaviy ehtiyojlarni qoplashga yetadi, — degan vazirlik rahbari.

Shuningdek, Energetika vazirligi O‘zbekistonda elektr uchun narxlarning oshishi 98 foiz isteʼmolchilarga mutlaqo taʼsir qilmasligini maʼlum qilgan.