Avvalroq, 2023-yil 26-noyabr kuni Toshkent viloyati Yangiyo‘l tumanida ayol kishining tok urishi oqibatida vafot etgani haqida xabar qilingan edi. Holat yuzasidan Bosh prokuratura axborot xizmati rahbari Hayot Shamsutdinov “Daryo”ga izoh berdi.
Aytilishicha, 1989-yilda tug‘ilgan I.V. simyog‘ochdan uzilib yerga tushgan elektr simidagi yuqori kuchlanishli elektr toki ta’sirida tan jarohati olib, Yangiyo‘l shahar markaziy kasalxonasi jonlantirish bo‘limida ko‘rsatilgan tibbiy muolajalarga qaramay vafot etgan.
Yangiyo‘l shahar sudga oid tibbiy ekspertizaning dastlabki ma’lumotnomasiпф ko‘ra, ayol o‘limiga tanasining 45-50 foiz kuyishi, kuyish shoki, ikki tomonlama buyrak usti bezlariga qon quyilishi sabab bo‘lganligi ko‘rsatilgan.
Mazkur holat yuzasidan Yangiyo‘l tuman prokuraturasi tomonidan Yangiyo‘l tuman elektr ta’minoti korxonasi mansabdor shaxslariga nisbatan Jinoyat Kodeksining 207-moddasi 3-qismi “a” (mansabga sovuqqonlik bilan qarash natijasida odam o‘lishiga sabab bo‘lish) bandi bilan jinoyat ishi qo‘zg‘atilgan, — deyiladi Bosh prokuratura axborotida.
Qo‘shimcha qilinishicha, Yangiyo‘l tuman elektr ta’minoti korxonasi mansabdor shaxslari harakatlariga huquqiy baho berish maqsadida, “O‘zenergoinspeksiya” Toshkent hududiy bo‘limiga xizmat tekshiruvi o‘tkazish to‘g‘risida taqdimnoma kiritilgan.
Hozirda tergov harakatlari davom etmoqda.
Izoh (0)