“Tutli” fotoelektr stansiyasi bir yilda 140 mingta xonadonni elektr bilan ta’minlashi ma’lum qilindi

Samarqand davlat universiteti kafedra mudiri Subhon Ahrorov quyosh elektr stansiyalari elektr energiya muammolari yechimi ekanini aytdi.

Ta’kidlanishicha, O‘zbekistonda ham energetika sohasiga strategik yo‘nalish sifatida e’tibor qaratilib, oxirgi yillarda yangi energiya quvvatlari qurilgan. Shunga qaramay aholining ortib borishi, sanoat korxonalarining ko‘payishi elektr energiyasiga bo‘lgan talabning ham yildan yilga oshishiga olib kelmoqda. Mamlakatda 2030-yilga kelib elektr energiyasiga bo‘lgan talab joriy 74 milliard kVt/soat dan 110 milliard kVt/soatgacha oshishi hisob-kitob qilingan.

Shu tufayli quyosh energiyasidan foydalanish borasida amaliy ishlar qilinmoqda. Masalan, fransuz kompaniyasi Total Eren to‘liq ishlab chiqqan “Tutli” fotoelektr stansiyasi 2022-yilda O‘zbekistonda qurilgan yirik quyosh elektr stansiyalardan biri hisoblanadi. Uning quvvati 131 mVt. U bir yilda 270000 kVt/soat elektr energiya ishlab chiqib, 140000 ta xonadonni elektr energiya bilan ta’minlaydi.

Qayd etilishicha, bunday quyosh elektr stansiyalarining ko‘plab barpo etilishi, o‘zbek quyosh energetikasining sifat jihatdan yangi bosqichga ko‘tarilishiga olib keladi.

“Agar yirik tashkilotlar, korxonalar ham qayta tiklanuvchi energiya manbalaridan ommaviy foydalanishga o‘tsa, tabiiy boyliklar zaxiralari saqlab qolinadi va tabiatga yetkazilayotgan zarar miqdori sezilarli darajada kamayadi. Shu bilan birgalikda, qayta tiklanuvchan energiya manbalaridan biri bo‘lgan quyosh nurini bevosita elektr energiyasiga aylantirib beradigan fotoelektr stansiyalaridan foydalanish atrof-muhitga zarar yetkazmay, iqtisodiyotni rivojlantirishga katta hissa qo‘shadi”, — deyiladi xabarda.