Bugun, 1-iyul kuni ijtimoiy tarmoqlarda elektr energiyasi iste’moli noto‘g‘ri hisoblanayotgani aytilgan postlar ko‘payib ketdi.
Jumladan, Facebook ijtimoiy tarmog‘idagi “Potrebitel” guruhi ishtirokchisining yozishicha, u to‘lov tizimiga kirib, hisobini tekshirganda, bir kunda 9,5 kVt elektr energiyasi sarflagani ko‘rsatilgan.
“Qiziq, bir kechada 9,53 kVt ni qanday ishlatishim mumkin? Konditsioner maksimum 30 daqiqa davomida ishladi, shuningdek, kir mashinasidan foydalandim, xolos. 6 soat ichida shuncha elektr sarflanishi mumkinmi?” degan post qoldirgan Guzalya Velichkina ismli foydalanuvchi.
Mazkur postning izohlarida boshqa foydalanuvchilar ham to‘lov tizimlari orqali o‘z hisoblarini tekshirganlari, ularda ham hisob-kitoblaridan ko‘ra ko‘proq elektr energiyasi sarflangani ko‘rsatilayotganini ma’lum qilishgan.
“Hududiy elektr tarmoqlari” AJ matbuot kotibi Faxriddin Nuraliyev bu postga quyidagicha munosabat bildirgandi.
“9,53 kVt bu o‘rtacha kunlik hisoblash. Oxirgi hisob-kitob shu yilning 31-may kunida olingan bo‘lib, unda ko‘rsatkich 5911 kVt bo‘lgan. Joriy hisob-kitob 30-iyun kuni olingan va unda ko‘rsatkich 6197 kVt.
Farq 30 kun ichida 286 kVt ni tashkil qiladi. Agar buni bir oyga bo‘lsangiz, taxminan o‘rtacha kunlik iste’mol 9,53 kVt ni tashkil qiladi.
Tizimda joriy kundagi ko‘rsatkichlar hali mavjud emasligi sababli hisoblash o‘rtacha kundalik iste’mol asosida faqat ma’lumot uchun amalga oshiriladi”, — deb yozdi Faxriddin Nuraliyev.
“Hududiy elektr tarmoqlari” mazkur holatlar yuzasidan quyidagilarni ma’lum qildi.
Ayni kunda butun respublika bо‘ylab elektr energiyasi hisobini yuritayotgan “Elektr energiyasini nazorat qilish va hisoblashning avtomatlashtirilgan tizimi” (ASKUE) tomonidan avtomat ravishda iste’mol qilingan elektr energiyasini har bir iste’molchi bilan hisoblashning sutkalik, oylik va yillik nazoratini olib boradi va buni shaffof ravishda har bir fuqaro kuzatib borish imkoni yaratilgan.
Ijtimoiy tarmoqlarda tarqalayotgan bunday xabarlarnig kelib chiqishining asosiy sababi ayrim tо‘lov tizimlarining “Hududiy elektr tarmoqlar” AJ bilan kelishmagan holda, gо‘yoki iste’molchilarga qulaylik yaratish maqsadida ma’lumotlar chiqarilgani sababli kо‘plab iste’molchilarda mana shunday tushunmovchiliklar yuzaga kelgan.
Iste’molchilar tomonidan kunlik iste’mol sifatida kо‘rsatilgan kо‘rsatkichlar aynan 24 soatlik sutkalik iste’mol kо‘rsatkichlari.
Iste’molchilardan elektr energiyasi hisobi kо‘rsatkichlari tо‘g‘risida aniq va tо‘g‘ri ma’lumotlarni “Hududiy elektr tarmoqlari” AJning rasmiy veb-saytidaga shaxsiy kabinet orqali olishlari tavsiya etildi.
Izoh (0)