Qoraqalpog‘istonning Qorao‘zak va Beruniy tumanlarida quvvati 200 MVt bo‘lgan shamol elektr stansiyasini hamda quvvati 100 MVt bo‘lgan elektr energiyasini saqlash tizimini qurish bo‘yicha o‘tkazilgan tender tanlovida g‘olib eʼlon qilindi. Bu haqda “Daryo” muxbiri xabar bermoqda.
“O‘zbekiston milliy elektr tarmoqlari” AJ bo‘lim boshlig‘i Fazliddin Sharofiddinovning aytishicha, tenderda g‘olib bo‘lgan investor shamol elektr stansiyasini loyihalashtiradi, moliyalashtiradi va boshqaradi.
Ushbu loyihaga dastlab 2022-yilda start berilgan edi. Tender savdolarining birinchi bosqichi 2022-yilning iyul oyida muvaffaqiyatli amalga oshirilgan. Dastlab 12 ta kompaniyadan taklif olingan. Baholash jarayonida 10 ta kompaniyaning tajriba va malakasi yetarli, deb topilgan hamda tenderning ikkinchi bosqichiga yo‘llanma berilgan.
Tenderning ikkinchi bosqichiga joriy yilning aprel oyida start berilgan bo‘lsa, bugun ishtirokchilarning takliflarini ko‘rib chiqish tadbiri bo‘lib o‘tdi, — dedi Fazliddin Sharofiddinov.
Maʼsulning alohida taʼkidlashicha, mazkur loyiha ishga tushirilsa, Xorazm va Qoraqalpog‘istonning elektr energiyaga bo‘lgan isteʼmolining yarmini taʼminlashi mumkin.
Loyihani 2025-yilda ishga tushirish rejalashtirilgan. Qiymati 220 million dollar deb baholangan. To‘g‘ridan-to‘g‘ri investitsiya bo‘lgani uchun banklarga kreditni qaytarishni quruvchi kompaniya kafolatlaydi. Davlat hech qanday kreditni qaytarish majburiyatini olmaydi, faqatgina 25 yil davomida ishlab chiqarilgan elektr energiyasini sotib olish bilan kifoyalanadi.
G‘olib bo‘lgan ACWA POWER-Saudi Listed Joint Stock Company (Saudiya Arabistoni) kompaniyasi 1 kVt.soat uchun 2,9 sent bilan shamol va elektr energiyasini saqlash uchun 4,09 sent taklif bergan.
Shamol elektr stansiyasini qurishlishi yiliga 250 million metr kubgacha bo‘lgan tabiiy gazni tejashga xizmat qiladi, — dedi O‘zbekiston milliy elektr tarmoqlari xodimi.
Mazkur loyiha Yevropa tiklanish va taraqqiyot banki ko‘magida “Umumiy quvvati 200 MVt bo‘lgan shamol elektr stansiyasi qurish loyihasini ishlab chiqish va maslahat xizmatlarini ko‘rsatish dasturi” (EBRD Phase 2) doirasida amalga oshirilmoqda.
Uni amalga oshirishga 2 ta xalqaro kompaniya qiziqish bildirdi. Moliyaviy takliflarning ochilish natijalari:
1. ACWA POWER-Saudi Listed Joint Stock Company (Saudiya Arabistoni) kompaniyasi tomonidan shamol elektr stansiyasida ishlab chiqariladigan 1 kVt·soat elektr energiyasi va elektr energiyasini saqlash tizimi uchun 4,09 AQSH senti taklif qilindi.
2. Abu Dhabi Future Energy Company PJSC – Masdar (BAA) kompaniyasi tomonidan shamol elektr stansiyasidan ishlab chiqariladigan 1 kVt soat elektr energiyasi va elektr energiyasini saqlash tizimi uchun 4,99 AQSH senti taklif qilindi.
“Qoraqalpog‘iston Respublikasining Qorao‘zak va Beruniy tumanlarida quvvati 200 MVt bo‘lgan shamol elektr stansiyasini hamda quvvati 100 MVt bo‘lgan elektr energiyasini saqlash tizimini qurish” loyihasi doirasida ACWA POWER-Saudi Listed Joint Stock Company kompaniyasi tenderning dastlabki g‘olibi, Abu Dhabi Future Energy Company PJSC – Masdar kompaniyasi tenderning zaxira g‘olibi, deb eʼlon qilindi.
Tanlov hujjatlari yaqin kunlarda Tender komissiyasi tomonidan YETTB maslahatchilari ishtirokida ko‘rib chiqiladi va tasdiqlanadi.
Izoh (0)