Rossiyada urushni yana bir yilga cho‘zish uchun yetarli mablag‘ bor — AQSH razvedkasi

Misli ko‘rilmagan sanksiyalarga qaramay, Rossiya yana kamida bir yil urush olib borish uchun yetarli mablag‘ga ega. Bu haqda  The Washington Post nashri Amerika razvedkasining internetga sizdirilgan maxfiy ma’lumotlariga tayanib yozmoqda.

Rossiyaning yuqori martabali amaldorlari, davlat idora va korxonalarining sanksiyalar ta’sirini his qilgan, lekin ularga moslashishga ham uringan. Rossiya iqtisodiy elitasining ayrim aʼzolari Kremlning Ukraina bo‘yicha siyosatiga qo‘shilmasligi va sanksiyalar ularning biznesiga zarar yetkazganiga qaramay, ular Vladimir Putinni qo‘llab-quvvatlashdan qaytishi dargumon, deyiladi mart oyi boshida berilgan razvedka hisobotida.

Hujjatda aytilishicha, Rossiya hukumati sanksiyalar ta’sirini yumshatish uchun “korporativ soliqlarning oshishiga, Milliy boylik fondi mablag‘lariga, importning ko‘payishiga, shuningdek, biznesning iqtisodiy bosimni yumshatishga moslashish qobiliyatiga umid qilmoqda”.

The Washington Post ta’kidlashicha, razvedka hisobotida so‘nggi cheklov choralari qanchalik samara bergani, shuningdek, Rossiya nefti narxiga cheklov joriy etilishining uzoq muddatli oqibatlari baholanmagan.

Nashr sanksiyalar nafaqat iqtisodiyotga bevosita ta’sir qilishi, balki Rossiya elitasiga ham ma’lum signal berishi kerak deb hisoblaydi va cheklovchi choralar samaradorligi razvedka hisobotida keltirilganidan ko‘ra kengroq omillarni hisobga olgan holda baholanishi kerakligini ta’kidlaydi.