Bugungi kunda Toshkentdagi O‘zekspomarkaz ko‘rgazmalar zalida turli mamlakatlardan tashrif buyurgan ishlab chiqaruvchilarning mahsulotlari namoyish etilgan bo‘lib, ular orasida Rossiyaning “Zavod Figur” kompaniyasi mahsulotlari ham joy olgan.
“Zavod Figur” yog‘och va metallardan turli shakllar, dizaynerlik figuralari, bolalar va sport maydonchalari uchun kerakli mahsulotlar, turli o‘rindiqlar va shezlonglar, o‘zidan yorug‘lik chiqaradigan har xil konstruksiyalar ishlab chiqaruvchi Rossiya kompaniyasi bo‘lib, hozirda mazkur kompaniya o‘z qamrovini kengaytirib bormoqda.
“Zavod Figur” kompaniyasi asoschisi uchun O‘zbekiston begona emas. Uning o‘zi Rossiyada tug‘ilgan bo‘lsa ham, ota-onasi O‘zbekistondan. Shu sababli tarixiy vatanida ishlab chiqarishni yo‘lga qo‘yib, odamlarni ish bilan ta’minlashni maqsad qilgan.
Kompaniya asoschisi Ikrom Shermatov “Daryo” bilan suhbatda “Zavod Figur”ning O‘zbekistondagi rejalari haqida so‘zlab berdi.
“Men o‘zim Rossiyada tug‘ilgan bo‘lsam ham millatim o‘zbek, ota-onam o‘zbekistonlik. Sovet Ittifoqi davrida Rossiyaga ishlash uchun borib, o‘sha yerda qolib ketishgan. Biz har doim O‘zbekistonda ham ishlab chiqarishni yo‘lga qo‘yishni reja qilardik. Mana endi shu rejamizni amalga oshirmoqchimiz. Bizning kompaniyamizda ishlaydigan aksariyat xodimlar ham O‘zbekistondan. Bu yerda filial ochadigan bo‘lsak, ular o‘z vatanlariga qaytib kelib, shu yerda ishlashdan mamnun bo‘lishadi.
Biz xiyobonlar, bolalar va sport maydonchalari, ko‘chalar uchun zarur bo‘lgan turli mahsulotlarni ishlab chiqaramiz. Bular o‘rindiqlar, urnalar, pergola va arg‘imchoqlar, xullas, shahar rivoji uchun zarur bo‘lgan barcha narsalar. Bizning kompaniyamiz 2015 yilda tashkil etilgan bo‘lib, boshida atigi 10 nafar ishchimiz bo‘lgan. Biz kundan kunga rivojlanib, ishlab chiqarishni kengaytirdik. Hozirda kompaniyamizda 1000 ga yaqin xodim faoliyat olib boradi.
Biz O‘zbekistonga o‘z mahsulotlarimizni namoyish qilish uchun keldik. Rejamiz Toshkent shahrida kompaniyamiz filialini ochish, yangi ish o‘rinlarini yaratish. Toshkentda ochiladigan filialimizga 500 nafarga yaqin xodim olmoqchimiz. Bular duradgorlar, payvandchi ustalar, metall bo‘yicha mutaxassislar, yig‘uvchi va qadoqlovchilar”, — deydi Ikrom Shermatov.
Izoh (0)