Tashqi mehnat migratsiyasi agentligi Rossiyaga borayotgan, ushbu mamlakatda bo‘lib turgan yoki chiqib ketayotgan O‘zbekiston fuqarolariga ogohlantirish bilan chiqdi.
Rossiyaning Moskva viloyatidagi Crocus City Hall konsert zalida 22-mart kuni yuz bergan terakt sababli butun mamlakat bo‘ylab xavfsizlik choralari kuchaytirilmoqda. Shu munosabat bilan agentlik Rossiyaga borayotgan, ushbu mamlakat hududida bo‘lib turgan yoki mamlakatdan chiqib ketayotgan fuqarolardan ushbu xavfsizlik choralari talablarini inobatga olgan holda harakatlanishni so‘radi.
Xususan, shaxsni taqdiqlovchi va mamlakatda bo‘lish yoki ishlash huquqini beruvchi hujjatlarni o‘zlari bilan birga olib yurish, jamoat joylariga sababsiz bormaslik, notanish yoki shubhali insonlar bilan muloqotga kirishmaslik, telefon va boshqa qurilmalarda taqiqlangan foto, audio va video materiallarni saqlamaslik, safar rejalashtirilgan bo‘lsa, vokzal yoki aeroportga belgilangan vaqtdan oldinroq borish kabilar tavsiya qilinadi.
“Yurtdoshlarimiz biror muammoga duch kelganda yoki o‘zlarini qiziqtirgan boshqa savollar bilan mamlakatimizning konsullik idoralari yoki Tashqi mehnat migratsiyasi agentligi vakolatxonasiga murojaat qilishi mumkin”, — deyiladi agentlik xabarida.
Izoh (0)