Braun universitetining “Urush xarajatlari” loyihasi hisobotiga ko‘ra, AQSH yil davomida Isroilga rekord darajadagi 17,9 milliard dollar harbiy yordam ko‘rsatdi.
Hisobotda aytilishicha, Isroilga ajratilgan mablag‘ning katta qismi artilleriya snaryadlaridan tortib bunkerlarni yo‘q qiladigan raketalarga sarflangan. Isroilning “Temir gumbaz” va “Dovudning sopqoni” havo mudofaa tizimlarini qurol-yarog‘ va reaktiv yoqilg‘i bilan to‘ldirish uchun 4 milliard dollardan ortiq mablag‘ ajratilgan.
Hujjatga ko‘ra, Vashington mintaqada harbiy amaliyotlarni yo‘lga qo‘yish uchun qo‘shimcha 4,86 milliard dollar bergan. Bu mablag‘ ichida Yaman husiylarining kemalarga hujumlarini bostirish kampaniyasiga ajratilgan pullar ham bor, deya aniqlik kiritmoqda AP.
Hisobotda aytilishicha, Isroil AQSHdan eng ko‘p harbiy yordam olgan davlatga aylandi. 1959-yildan beri Isroil Amerikadan taxminan 251,2 mlrd dollar miqdorida yordam olgan (inflyatsiyani hisobga olgan holda). Isroilga yil davomida ajratilgan mablag‘ AQSHning bir yil ichidagi eng yirik harbiy yordamiga aylandi.
2023-yilning 7-oktyabr kuni HAMAS jangchilari G‘azo sektori bilan chegaradosh Kibbuts Reim shahridagi musiqa festivaliga tashrif buyuruvchilarga hujum uyushtirgandi. Ular 253 nafar isroillikni asirga olib, anklavga olib ketgan.
- Isroil rasmiylariga ko‘ra, 1,2 mingga yaqin odam hujum qurboni bo‘lgan. Bunga javoban Isroil G‘azo sektorida harbiy operatsiya boshladi. Falastin Sog‘liqni saqlash vazirligi ma'lumotlariga ko‘ra, G‘azoda mojaro boshlanganidan beri bir yil ichida 42 mingga yaqin odam halok bo‘lgan.
- So‘nggi oy ichida mintaqada — Isroil va Livan chegarasida keskinlikning yangi bosqichi boshlandi.
Izoh (0)