Rossiya, Xitoy, Eron va Pokiston tashqi ishlar vazirlari “Tolibon” harakatidan inklyuziv hukumat tuzishni va afg‘on ayollariga nisbatan cheklov choralarini to‘xtatishni talab qildi. Bu haqda “Daryo”ning Afg‘onistondagi muxbiri xabar berdi.
13-aprel Samarqandda bo‘lib o‘tgan norasmiy to‘rt tomonlama uchrashuv yakunida mazkur davlatlar qo‘shma bayonot bilan chiqdi. Unda davlatlarning tashqi ishlar vazirlari Afg‘onistondagi xavfsizlik yuzasidan chuqur xavotir bildirgan.
Rossiya, Xitoy, Eron va Pokiston tashqi ishlar vazirlarining qo‘shma bayonotida barcha terrorchi guruhlar, jumladan ISHID dunyo va mintaqa xavfsizligiga jiddiy tahdid sifatida baholangan. Mazkur davlatlar “Tolibon”dan terrorizmga qarshi kurashish va terrorchi guruhlarni yo‘q qilish uchun amaliy choralar ko‘rishni so‘ragan.
Eron tashqi ishlar vaziri Husayn Amir Abdullohiyonning aytishicha, Afg‘onistonning qo‘shnilari, xususan, Eron Afg‘oniston kelajagi haqida ko‘proq xavotirda.
“Biz Afg‘onistonda terrorizm va ekstremizm tarqalishidan xavotirdamiz”, — degan u va Amerikaning Afg‘onistondagi siyosatini tanqid qilar ekan, Afg‘oniston G‘arb va Amerika aralashuvidan ko‘ra hamkorlik va “mintaqaviy yechimlar”ga muhtoj ekanini bildirdi.
Yuqorida keltirib o‘tilgan to‘rt davlatning yuqori martabali diplomatlari hamon AQSH va uning ittifoqchilaridan Afg‘onistondagi keskin vaziyatga javob berishni talab qilmoqda.
Bu Rossiya, Xitoy, Eron va Pokiston o‘rtasida Afg‘oniston masalasiga bag‘ishlangan ikkinchi to‘rt tomonlama uchrashuv hisoblanadi.
Izoh (0)