Rossiya Isroilning Damashqdagi Eron konsulligiga uyushtirgan hujumiga xalqaro hamjamiyat tegishli huquqiy baho berishi kerakligini aytib, bunday tajovuzkor harakatlarga chek qo‘yishi lozim, degan fikrni bildirdi. Bu haqda Rossiya TIV bayonotiga tayanib, “TASS” xabar berdi.
Isroilning bunday tajovuzkor xatti-harakatlariga mutlaqo yo‘l qo‘yib bo‘lmaydi va to‘xtatilishi kerak, deb hisoblaymiz. Biz xalqaro hamjamiyatning barcha mas’ul a’zolari bu harakatlarga tegishli huquqiy baho berishini zarur, deb hisoblaymiz. Biz Isroil rahbariyatini butun mintaqada o‘ta xavfli oqibatlarga olib keladigan provokatsion harbiy harakatlardan voz kechishga qatʼiy chaqiramiz, — deyiladi vazirlik bayonotida.
Rossiya TIVga ko‘ra, hujum natijasida bino butunlay vayron bo‘lgan, halok bo‘lganlar va yaralanganlar orasida diplomatlar ham bor. Moskva Eronning Suriyadagi konsullik vakolatxonasiga qilingan hujumni keskin qoralaydi.
Vazirlik tegishli Vena konvensiyalari bilan daxlsizligi kafolatlangan diplomatik va konsullik muassasalariga qilingan har qanday hujumni mutlaqo qabul qilib bo‘lmas deb hisoblashini aytgan. Shuningdek, bayonotda hujumning aholi zich joylashgan hududda amalga oshirilgani, bu esa tinch aholi orasida ommaviy qurbonlarning yuqori xavfini keltirib chiqarishiga urg‘u berilgan.
Izoh (0)