Erondagi harbiy zavodlarga uyushtirilgan dronlar hujumida Isroil emas, AQSH va yana bir davlat aybdor — OAV
Eronning Isfahon shahridagi harbiy obyektga uyushtirilgan dronlar hujumida AQSH harbiy-havo kuchlari va yana bir davlat aybdor, Isroilning hujumga aloqasi yo‘q. Bu haqda AQSHdagi manbalarga tayanib, Al-Hadath xabar berdi.
Ma’lum qilinishicha, hujumda Eronning ballistik raketalar omborxonasi nishonga olingan. Mazkur operatsiya Eron va Rossiyaga “zavodlar tashkil etish va ballistik qurollarni eksport qilishga yo‘l qo‘ymaslik”, haqida signal yuborgani ta’kidlanadi.
Al-Arabia manbalarga tayanib, AQSH Harbiy-havo kuchlari va “yana bir davlat” Erondagi harbiy zavodga dronlar yordamida hujum qilganini xabar qilgan. Al-Hadath telekanali Isroilning hujumga aloqasi yo‘qligini qayd etmoqda.
IRNA agentligining xabar berishicha, Eron hukumati dron hujumi yuzasidan tekshiruv boshlagan. Eron parlamenti Milliy xavfsizlik komissiyasining uch nafar a’zosi portlash sodir bo‘lgan joyga tashrif buyurishni rejalashtirmoqda. Aviahujum oqibatida hech kim jabrlanmagani ta’kidlanmoqda.
Eslatib o‘tamiz, Erondagi ishlab chiqarish obyektlaridan biriga 29-yanvarga o‘tar kechasi dronlar hujum qilgan. Al-Arabia telekanalining yozishicha, Isroil Eron harbiy sanoatini yo‘q qilish uchun ushbu mamlakat hududida maxsus harbiy amaliyot boshlagan. Isroil tomoni bu xabar yuzasidan munosabat bildirmagan.
