Sirdaryoda kambag‘allikni qisqartirish bo‘yicha yangicha yondashuv taklif qilindi

Sirdaryoda kambag‘allikni qisqartirish bo‘yicha yangicha yondashuv taklifi ilgari surildi. Bu haqda Ijtimoiy himoya milliy agentligi xabar berdi.

Ma’lum qilinishicha, agentlik direktori Mansurbek Olloyorov Sirdaryo tumanida bo‘lib, Sirdaryo viloyati hokimi Akmaljon Mahmudaliyev hamrohligida hududda “Ijtimoiy himoya yagona reyestri”da ro‘yxatga olingan oilalar, ularning kambag‘allikdan chiqarish uchun mavjud imkoniyatlarni o‘rgandi.

Dastlab hududda kambag‘allikni qisqartirish borasida amalga oshirilayotgan ishlar va kutilayotgan natijalar tahlili yuzasidan soha masʼullari va “mahalla yettiligi” ning taklif va rejalari tinglandi.

So‘ng tumanning “Ilg‘or” va “Oq yo‘l” mahallalarida og‘ir ijtimoiy vaziyatga tushib qolgan oilalar va nogironligi bo‘lgan shaxslar xonadoniga kirilib, ularning turmush sharoiti ko‘zdan kechirildi. Fuqarolar bilan suhbat qilindi.

Qayd etilishicha, endilikda har bir oilaning ijtimoiy ahvolidan kelib chiqqan holda dastlab uni kambag‘allikdan chiqarish uchun monelik qilayotgan omillar bartaraf etilladi. So‘ng uni daromadli qilish choralari ko‘riladi.

“Mahalla yettiligi” o‘zaro hamjihatlikda har bir oilaning ijtimoiy holatidan kelib chiqib, manzilli reja ishlab chiqishi lozimligi taʼkidlandi.

Bundan tashqari, ushbu hududdagi bo‘sh turgan davlat mulki obyektlari bilan ham tanishilib, unga tadbirkorlarni jalb qilish, yangi ish o‘rinlarini yaratish bo‘yicha masʼullar oldiga vazifalar belgilab berildi.