O‘zbekistonda xususiy mulk va mulkdorlar huquqlari himoya qilinishi kafolatlari kuchaytiriladi. Prezident 29-avgust kuni imzolagan qonun bilan ayrim qonun hujjatlariga o‘zgartirish va qo‘shimchalar kiritildi.
Unga ko‘ra, uy-joyidan mahrum etilgan mulkdorga uy-joyning qiymati hamda u ko‘rgan zararlarning o‘rni belgilangan tartibda qoplanishini nazarda tutuvchi o‘zgartirish va qo‘shimchalar kiritilmoqda.
Shuningdek, tadbirkorlik subyektlari tovarlari, xizmatlari, mehnat resurslari va moliyaviy mablag‘larining, ushbu subyektlar davlat ro‘yxatidan o‘tgan hududdan qat’i nazar, O‘zbekiston hududida erkin harakatlanishiga doir huquqi ta’minlanishi belgilanmoqda.
Bundan tashqari, Shaharsozlik kodeksiga sel va ko‘chki xavfi mavjud bo‘lgan hududlarda binolar va inshootlarni loyihalashtirish hamda qurish taqiqlanishini nazarda tutuvchi qo‘shimcha kiritilmoqda.
Qonun rasmiy e’lon qilingan kundan e’tiboran kuchga kirdi.
Eslatib o‘tamiz, aprel oyida Senatning Byudjet va iqtisodiy islohotlar masalalari qo‘mitasining navbatdagi majlisida O‘zbekistonning ayrim qonun hujjatlariga o‘zgartirish va qo‘shimchalar kiritishga oid qonunlar muhokama qilingandi. Unda hech kim sud qarorisiz, qonunga zid tarzda uy-joyidan mahrum etilishi mumkin emasligi, uy-joyidan mahrum etilgan mulkdorga uy-joyning qiymati, u ko‘rgan zararlarning o‘rni qonunda nazarda tutilgan hollarda va tartibda oldindan hamda teng qiymatda qoplanishi taʼminlanishi belgilanayotgani ma’lum qilingandi.
Hech kim sudning qarorisiz va qonunga zid tarzda uy-joyidan mahrum etilishi mumkin emasligi Yangi tahrirdagi Konstitutsiyaning 47-moddasida mustahkamlab qo‘yilgan.
Izoh (0)