O‘zbekistonda Mustaqillik bayrami munosabati bilan 31-avgust hamda 1—3-sentyabr dam olish kunlari etib belgilangan. Bu kunlarda avtobuslar qanday jadval asosida harakatlanishi ma’lum qilindi.
“Toshshahartransxizmat” AJ e’lon qilgan ma’lumotga ko‘ra, avtobus saroylari tasarrufidagi avtobus yo‘nalishlarining faoliyati dam olish kunlari, ya’ni 31-avgust va 1-, 2-, 3-sentyabr kunlari yakshanba kunlari uchun tasdiqlangan jadvallar asosida tashkil etiladi.
Bayram kunlari Toshkent metrosining ish tartibi
2024-yil 31-avgust va 1-sentyabr kunlarida metro poyezdlari harakati odatiy ish kunlari uchun belgilangan jadval asosida faoliyat olib boradi. 2—3-sentyabr kunlari esa, metro poyezdlari dam olish kunlari uchun mo‘ljallangan jadval asosida harakatlanadi.
Eslatib o‘tamiz, o‘zbekistonliklar Mustaqillik bayrami munosabati bilan ketma-ket 4 kun dam oladi. 3-sentyabr, seshanba ish haftasining turidan qat’i nazar, barcha xodimlar uchun qo‘shimcha dam olish kuni etib belgilangan. 1-sentyabr — O‘zbekiston mustaqilligi kuni 2024-yilda yakshanba — dam olish kunlariga to‘g‘ri kelishi munosabati bilan ushbu dam olish kuni 2-sentyabr, dushanba kuniga ko‘chiriladi. 31-avgust, shanba — haftasiga 6 kun ishlaydiganlar uchun qo‘shimcha dam olish kuni, 5 kunliklar uchun odatiy dam olish kuni bo‘ladi.
Mustaqillik bayrami kunlari qanday ob-havo kuzatiladi?
Avgust oyining oxirgi kunlarida va 1—3-sentyabr bayram kunlarida O‘zbekiston hududi bo‘yicha quruq va kam bulutli ob-havo bo‘lishi kutilmoqda. Nisbatan salqin havoning kirib kelishi baʼzi joylarda shamol tezligi 15-20 metr/sekundgacha kuchayishi, ayrim joylarda chang-to‘zon bilan qayd etiladi.
Izoh (0)