Afg‘onistonda birorta ham NATO harbiy xizmatchisi qolmadi. Ularning ko‘pchiligi ayollar kiyimida mamlakatni tark etdi, dedi “Tolibon” hukumatidagi Mudofaa vazirligining logistika bo‘limi boshlig‘i general Sayid Abdul Basir Sobiriy.
General Rossiyaning “TASS” agentligiga bergan intervyusida: “Birorta ham amerikalik harbiy xizmatchi yo‘q. Bu yuz foiz aniq. Ular hatto ayollar kiyimida ham qochib ketishdi, biz ataylab ularga tegmadik. Butun dunyo bilsin, biz ayollarga tegmaymiz”, deb aytdi.
Sayid Abdul Basir Sobiriyning qo‘shimcha qilishicha, 20 yil avval NATO Afg‘onistonga “o‘z manfaatlari yo‘lida mamlakatda nimanidir o‘zgartirishi mumkinligiga ishonch bilan” bostirib kirgan, ammo ittifoq muvaffaqiyatsizlikka uchradi.
Avvalroq “Tolibon” Mudofaa vazirligi O‘zbekistonga 2021-yil afg‘on harbiylari tomonidan olib o‘tilgan aviatexnikalar Afg‘onistonga qaytarilmasligiga qarshi chiqqandi.
“O‘zbekistondagi afg‘on vertolyotlari va samolyotlari taqdiriga oid har qanday kelishuv qabul qilinishi mumkin emas. Toshkent yaxshi qo‘shnichilikni inobatga olib, oqilona qaror qabul qilishi va Afg‘oniston harbiy-havo kuchlariga tegishli samolyotlarni topshirishda yordam berishi kerak”, deb bayonot bergandi Afg‘oniston TIV.
Izoh (0)