“Tolibon” Mudofaa vazirligi O‘zbekistonga 2021-yil afg‘on harbiylari tomonidan olib o‘tilgan aviatexnikalar Afg‘onistonga qaytarilmasligiga qarshi chiqdi. Bu haqda Hasht-e Subh Daily xabar berdi.
![](/static/2024/08/27/photo_2024-08-27_15-40-13-z8BAn-LB.jpg)
Vazirlik bayonotiga ko‘ra, AQSH Afg‘oniston xalqining mulkini “musodara qilish huquqiga ega emas”.
“O‘zbekistondagi afg‘on vertolyotlari va samolyotlari taqdiriga oid har qanday kelishuv qabul qilinishi mumkin emas. Toshkent yaxshi qo‘shnichilikni inobatga olib, oqilona qaror qabul qilishi va Afg‘oniston harbiy-havo kuchlariga tegishli samolyotlarni topshirishda yordam berishi kerak”, deyiladi bayonotda.
“Tolibon” O‘zbekiston hukumatidan bu masalada har qanday kelishuvdan voz kechishni so‘ragan. Avvalroq AQSHning O‘zbekistondagi elchisi Jonatan Henik ikki davlat Afg‘onistonning sobiq armiyasiga tegishli samolyotlar taqdiri bo‘yicha kelishuvga erishganini va harbiy texnikalar Toshkentda qolishini e’lon qilgandi. Elchi aviatexnikalar AQSHga tegishli ekanini ta’kidlagan.
![](/static/2024/08/27/photo_2024-08-27_15-40-15-lmcWM7j0.jpg)
O‘zbekistonga olib o‘tilgan aviatexnikalar
2021-yil avgust oyida “Tolibon” Kobulni egallab, o‘sha paytdagi prezident Ashraf G‘ani mamlakatdan ketganida afg‘on harbiylari samolyot va vertolyotda O‘zbekistonga qochib o‘tgan. O‘zbekiston prezidentining Afg‘oniston bo‘yicha maxsus vakili Ismatilla Ergashev O‘zbekistonga sobiq afg‘on uchuvchilari tomonidan olib o‘tilgan samolyot va vertolyotlar “Tolibon” harakatiga qaytarilmasligini ta’kidlagan.
![](/static/2024/08/27/photo_2024-08-27_15-40-17-wYd2v3MD.jpg)
Ergashevning so‘zlariga ko‘ra, aviatexnikalarni AQSH hukumati sotib olib bergan va Afg‘oniston sobiq hukumatiga vaqtinchalik foydalanish uchun topshirgan. Sobiq hukumat bu uchoqlarga bir dollar ham sarflamagan.
Siyosatchi afg‘on samolyotlari O‘zbekistonga kirgan payt chegarada bo‘lib, voqeaning bevosita ishtirokchisiga aylanganini aytgan. U jarayon O‘zbekiston sudi hukmiga binoan qaror qilinishi, lekin vositalarni olib ketish Amerika ixtiyorida ekanini ta’kidlagan.
- Statistik ma’lumotlarga ko‘ra, Afg‘oniston hukumati o‘zgarishi davrida Tojikiston va O‘zbekistonga avvalgi hukumatning 80 dan ortiq harbiy uchoqlari olib o‘tilgan.
- 2023-yil boshida marshal Abdurashid Do‘stum ushbu aviatexnikalarni Afg‘oniston qarshilik frontiga topshirishga chaqirgandi.
- Yaqinda O‘zbekiston va AQSH rasmiylari afg‘on harbiylari tomonidan foydalanilgan aviatexnikalar borasida o‘zaro kelishuvga erishdi.
- AQSH nega bunday qarorga kelganini ekspertlar tushuntirdi, havola orqali bu haqda ma’lumot olishingiz mumkin.
Izoh (0)