Raqobat qo‘mitasi omonat turlari reklamasida muhim ma’lumotlar to‘liq berilmagani uchun “Ipak Yo‘li” bankiga jarima qo‘lladi. Bu haqda qo‘mita matbuot xizmati xabar berdi.
Qo‘mita tomonidan o‘tkazilgan o‘rganishlar davomida aniqlanishicha, ushbu bank tomonidan e’lon qilingan “Universal” va “Milliy” nomli omonat turlari reklamasida “Universal” omonat turi bo‘yicha yillik foiz stavkasi 22 foiz, “Milliy” omonat turi bo‘yicha yillik foiz stavkasi 25 foiz ekanligi haqida axborotlar berilgan.
Bankning rasmiy saytida “Universal” omonat turi bo‘yicha omonatga qo‘yilgan mablag‘lar bo‘yicha yilning dastlabki 6 oyi uchun depozit hisobraqamlari yopilishi muddatiga qarab yillik 14 foiz stavka va yilning keyingi 6 oyi uchun 18 foiz stavka bo‘yicha qayta hisoblab chiqilishi haqida ma’lumot ko‘rsatib o‘tilgan.
Ammo yuqorida keltirib o‘tilgan reklama vositalarida “Universal” nomli omonat turi haqidagi boshqa muhim ma’lumotlar to‘liq berilmagan.
Yuqoridagilarga ko‘ra, qo‘mita maxsus komissiyasi “Reklama to‘g‘risida”gi qonunning 16- va 43- moddalari va “Iste’molchilar huquqlarini himoya qilish to‘g‘risida”gi qonunning 6-moddasi talablari buzilishi alomatlari yuzasidan “Ipak Yo‘li” AITBga nisbatan ish qo‘zg‘atib, natijasi yuzasidan belgilangan tartibda moliyaviy jarima qo‘lladi.
Qo‘mita qonun buzilishi holatini bartaraf etish va kelgusida yo‘l qo‘ymaslik bo‘yicha ko‘rsatma ham bergan.
Bundan avval qo‘mita noto‘g‘ri reklama tarqatilgani uchun AVO Bank AJni jarimaga tortgandi. “Ipoteka bank”ga ham moliyaviy jarima qo‘llangandi. Shuningdek, tashqi reklama vositalari qonuniyligi ortidan Orient Finans Termiz filiali ham jarimaga tortilgandi.
Izoh (0)