Афғонистонда бирорта ҳам НАТО ҳарбий хизматчиси қолмади. Уларнинг кўпчилиги аёллар кийимида мамлакатни тарк этди, деди “Толибон” ҳукуматидаги Мудофаа вазирлигининг логистика бўлими бошлиғи генерал Сайид Абдул Басир Собирий.
Генерал Россиянинг “ТАСС” агентлигига берган интервьюсида: “Бирорта ҳам америкалик ҳарбий хизматчи йўқ. Бу юз фоиз аниқ. Улар ҳатто аёллар кийимида ҳам қочиб кетишди, биз атайлаб уларга тегмадик. Бутун дунё билсин, биз аёлларга тегмаймиз”, деб айтди.
Сайид Абдул Басир Собирийнинг қўшимча қилишича, 20 йил аввал НАТО Афғонистонга “ўз манфаатлари йўлида мамлакатда ниманидир ўзгартириши мумкинлигига ишонч билан” бостириб кирган, аммо иттифоқ муваффақиятсизликка учради.
Аввалроқ “Толибон” Мудофаа вазирлиги Ўзбекистонга 2021 йил афғон ҳарбийлари томонидан олиб ўтилган авиатехникалар Афғонистонга қайтарилмаслигига қарши чиққанди.
“Ўзбекистондаги афғон вертолётлари ва самолётлари тақдирига оид ҳар қандай келишув қабул қилиниши мумкин эмас. Тошкент яхши қўшничиликни инобатга олиб, оқилона қарор қабул қилиши ва Афғонистон ҳарбий-ҳаво кучларига тегишли самолётларни топширишда ёрдам бериши керак”, деб баёнот берганди Афғонистон ТИВ.
Изоҳ (0)