79 yoshli aktyor, “Xavfli joziba”, “Asosiy instinkt”, “Yetar, bas” filmlari bilan mashhur bo‘lgan Maykl Duglas va “Zorro niqobi” filmida rol o‘ynagan 54 yoshli Ketrin Zeta-Jons xonadonini sotuvga qo‘ydi. Uy Nyu York yaqinidagi dengiz bo‘yida joylashgan bo‘lib, 12 million dollarga baholangan. Irvingtonda joylashgan hashamatli uy 5 gektar yerni egallaydi.
Zeta-Jonsning aytishicha, endilikda uning turmush o‘rtog‘i farzandlaridan alohida, ikki xil uyda yashashni rejalashtirmoqda: biri Bermud orollarida, ikkinchisi Yevropada joylashgan.
Wall Street Journal ma’lumotlariga ko‘ra, ko‘chmas mulkning sotilishi mashhur juftlikka 7,5 million dollar daromad keltirishi mumkin, chunki Zeta-Jons 2019-yilda uyni atigi 4,5 million dollarga xarid qilgan.
Xonadon Nyu York shahridan 32 kilometr uzoqlikda ko‘rkam va zamonaviy qishloqda joylashgan bo‘lib, Gudzon daryosi bo‘ylab davom etgan ajoyib landshaftga ega. Ketrinning aytishicha, bolalari voyaga yetgach, turmush o‘rtog‘i bilan alohida uyda vaqt o‘tkazishni istaydi.
“Men Irvingtondagi uyni xarid qilganimda oilamiz bu xonadonda ko‘plab baxtli kunlarini o‘tkazishiga qattiq ishonar edim va shunday bo‘ldi ham. Endi o‘g‘limiz va qizimiz katta hayotga qadam qo‘yar ekan, menimcha, uyni sotish vaqti keldi”, — deydi aktrisa.
So‘nggi paytlarda yulduzlarning aktyorlik faoliyati Yevropada davom etayotgani uchun ular AQSHga kamroq tashrif buyurishga qaror qilgan:
“Maykl va men Bermud orollari va Yevropada ko‘proq vaqt o‘tkazishni rejalashtirmoqdamiz”, — dedi Zeta-Jons.
Sotuvga qo‘yilgan saroydek katta uy o‘ziga xos tarixga ega. Anna Mari Leonning “Irvington” kitobiga ko‘ra, bu yerlar bir vaqtlar shakar savdosi bilan shug‘ullangan Mattissen oilasiga tegishli bo‘lgan. 1902-yilda Konrad Mettissen mashhur Tiffany & Co. zargarlik kompaniyasi asoschisi, marhum Charlz Lyuis Tiffaniga tegishli bo‘lgan 20 gektar yerni sotib olgan. Hozirda ushbu yerlar Duglas va Zeta-Jons mulkidir.
Xonadon keng ko‘lamli ta’mirlash ishlari bilan modernizatsiya qilgan bo‘lib, xonadonning tarixiy dizaynini saqlab qolishga harakat qilingan. Uy interyeri o‘zida klassik va zamonaviy dizaynni mujassam etgan hamda ko‘chib o‘tish va yashash uchun tayyor holatda.
Izoh (0)