Turkiya rasmiylari 4-iyun kuni mamlakat muzeylarida saqlanayotgan 55 ta tarixiy artifaktni Eronga qaytargan. Bu haqda Anadolu nashri xabar berdi.
Manbada aytilishicha, Eron tarixiga daxldor artifaktlarning barchasi Tehron bilan madaniy hamkorlik doirasida topshirilgan. Artifaktlarning qaysi davrga aloqadorligi hamda Eron tarixi bilan chambarchasligi borasida uzoq vaqt tekshiruv olib borilgan.
Tehronga topshirilgan artifaktlar mamlakatning turli shaharlaridagi muzeylardan yig‘ilgan va dastlab Erzurumdagi arxeologiya muzeyiga olib kelingan. Erzurumda Eron vakillari ishtirokida tarixiy ashyolarni topshirish marosimi o‘tkazilgan.
Madaniy meros va muzeylar bosh boshqarmasi direktori Birol Injejikoz Turkiya rasmiylari artefaktlarning noqonuniy kontrabandasi bo‘yicha keng qamrovli ish olib borayotganini aytgan. Xorijiy davlatlarga tegishli ashyolar faqat hukumat vositachiligidagina topshirilishi maʼlum qilingan.
Birol Injejikoz maʼlum qilishicha, Turkiya oxirgi 7 yil ichida 7824 ta artifaktni o‘z mamlakatiga qaytargan. Turkiyaga taalluqli manbalarni olib kelish borasida ham muvaffaqiyatli ish olib borgan.
“Biz noqonuniy yo‘llar bilan olib o‘tilgan ashyolarni mamlakatimizga qaytarish borasida qonun ishlab chiquvchi kam sonli davlatlardan biriga aylandik. Mamlakat sifatida biz har bir madaniy yodgorlik u mansub bo‘lgan mamlakatning nodir gavhari ekanligini taʼkidlab kelamiz. U qaysi davlatga tegishli bo‘lsa, o‘sha yurtga qaytarilishi kerak”, — degan Birol Injejikoz ashyolarni Eron vakillariga topshirish marosimida.
Turkiya rasmiylari Tehronga qaytarilgan buyumlar orasida Sosoniy qilichi, 42 ta tanga, bronza ko‘za, bronza va Islom davriga oid 11 ta buyum borligini bildirgan.
Eronning Erzurumdagi bosh konsuli Muhammad Ibrohimiy Turkiyaga tarixiy ashyolar qaytarilgani uchun minnatdorchilik izhor qilgan.
Izoh (0)