Turkiya politsiyasi 23-may kuni Interpol tomonidan xalqaro qidiruvga berilgan ikki nafar xorijlikni hibsga oldi. Bu haqda Turkiya Ichki ishlar vazirligi xabariga asoslanib, Anadolu nashri xabar berdi.
Manbada aytilishicha, fuqarolar Istanbuldagi maxsus operatsiyada qo‘lga olingan. Turkiya Ichki ishlar vazirligi ushbu maʼlumotni tasdiqlagan.
Hibsga olingan shaxslar Chernogoriya fuqarosi Sead Dedeich va niderlandiyalik Marsiano Evjini Ruimviklar bo‘lgan. Sead Dedeich Interpol tomonidan qizil darajadagi ogohlantirish bilan qidiruvda bo‘lgan.
Hibsga olinganlar turli moddalar, jumladan, giyohvand moddalar savdosiga aloqadorlik bo‘yicha qidiruvda bo‘lgan. Ularga transchegaraviy jinoyatchilik ayblovi ham qo‘yilgan.
“Milliy va xalqaro uyushgan jinoyatchilik tashkilotlari, giyohvand moddalar savdogarlari va xalqimiz tinchligini buzayotgan jinoiy guruhlarga nafas olishga ham imkon bermaymiz”, — degan Turkiya ichki ishlar vaziri Ali Yerlikaya.
Oldinroq Interpol, Italiya va Turkiya politsiyalari hamkorligida Italiyaning Milan shahrida 19 nafar Interpol qidiruvidagi shaxslar qo‘lga olingani xabar qilingan edi. Ulardan 17 nafari turkiyalik bo‘lgan. Hibsga olinganlar xalqaro jinoiy tuzilma tashkil etish va kontrabanda bilan aloqadorlikda ayblangan edi.
Izoh (0)