Туркия 55 та тарихий артифактни Эронга қайтариб берди

Туркия расмийлари 4 июнь куни мамлакат музейларида сақланаётган 55 та тарихий артифактни Эронга қайтарган. Бу ҳақда Anadolu нашри хабар берди.

Манбада айтилишича, Эрон тарихига дахлдор артифактларнинг барчаси Теҳрон билан маданий ҳамкорлик доирасида топширилган. Артифактларнинг қайси даврга алоқадорлиги ҳамда Эрон тарихи билан чамбарчаслиги борасида узоқ вақт текширув олиб борилган.

Теҳронга топширилган артифактлар мамлакатнинг турли шаҳарларидаги музейлардан йиғилган ва дастлаб Эрзурумдаги археология музейига олиб келинган. Эрзурумда Эрон вакиллари иштирокида тарихий ашёларни топшириш маросими ўтказилган.

Маданий мерос ва музейлар бош бошқармаси директори Бирол Инжежикоз Туркия расмийлари артефактларнинг ноқонуний контрабандаси бўйича кенг қамровли иш олиб бораётганини айтган. Хорижий давлатларга тегишли ашёлар фақат ҳукумат воситачилигидагина топширилиши маълум қилинган.

Бирол Инжежикоз маълум қилишича, Туркия охирги 7 йил ичида 7824 та артифактни ўз мамлакатига қайтарган. Туркияга тааллуқли манбаларни олиб келиш борасида ҳам муваффақиятли иш олиб борган.

“Биз ноқонуний йўллар билан олиб ўтилган ашёларни мамлакатимизга қайтариш борасида қонун ишлаб чиқувчи кам сонли давлатлардан бирига айландик. Мамлакат сифатида биз ҳар бир маданий ёдгорлик у мансуб бўлган мамлакатнинг нодир гавҳари эканлигини таъкидлаб келамиз. У қайси давлатга тегишли бўлса, ўша юртга қайтарилиши керак”, — деган Бирол Инжежикоз ашёларни Эрон вакилларига топшириш маросимида.

Туркия расмийлари Теҳронга қайтарилган буюмлар орасида Сосоний қиличи, 42 та танга, бронза кўза, бронза ва Ислом даврига оид 11 та буюм борлигини билдирган.

Эроннинг Эрзурумдаги бош консули Муҳаммад Иброҳимий Туркияга тарихий ашёлар қайтарилгани учун миннатдорчилик изҳор қилган.