Amerikaning Delaver shtatida AQSH prezidenti Jo Baydenning o‘g‘li Hanter Baydenga qarshi birinchi sud jarayoni boshlandi. Bu haqda Deutsche Welle xabar berdi.
3-iyun kuni 54 yoshli Hanter Bayden Uilmington sudida qurolni noqonuniy saqlashda uchta ayblov bo‘yicha so‘roq qilingan. Hanter Bayden sud majlisida rafiqasi va o‘gay onasi, AQSHning birinchi xonimi Jill Bayden hamrohligida qatnashgan. Sud jarayoni bir haftadan ikki haftagacha davom etishi kutilmoqda.
Jo Bayden o‘z bayonotida sud jarayonlari haqida izoh berishni istamasligini, lekin o‘g‘lini yaxshi ko‘rishi, ishonishi va uning kuchliligi uchun hurmat qilishini aytgan.
Hanter Baydenga qo‘yilgan ayblovlar
Sobiq advokat, lobbist va biznesmen Hanter Bayden 2018-yilda Colt Cobra .38 revolverini sotib olish uchun blankalarni to‘ldirayotganda giyohvand moddalarni iste’mol qilmaslik haqida yolg‘on gapirganlikda ayblangan. O‘sha yilning oktyabr oyida u giyohvandlik holatida 11 kun davomida qurol saqlagan. Bu holatda Hanter Bayden 25 yilgacha qamoq jazosi, shuningdek, 750 ming dollar jarimaga tortilishi mumkin.
11 kun davomida o‘qsiz qurolga ega bo‘lgan Hanter Bayden jamoat xavfsizligiga tahdid solmagan, ammo siyosiy bosimga berilib ketgan prokuror adliya tizimimizga jiddiy xavf solmoqda, — deydi kichik Baydenning advokati.
Bu Qo‘shma Shtatlar tarixida amaldagi prezidentning farzandiga qarshi birinchi sud jarayonidir.
Hanter Baydenga nisbatan tergov 2018-yildan beri davom etmoqda. 2023-yilda u soliq to‘lashdan bo‘yin tovlaganlik va noqonuniy qurol saqlash aybini tan olishga rozi bo‘lgan. Sudgacha bo‘lgan kelishuv unga haqiqiy jazoni yengillashtirishga yordam berishi kerak edi. Okrug sudi sudyasi Mariellen Noreyka tegishli kelishuvni imzolashdan bosh tortgani uchun ayblov shartnomasi buzilgan. Shartnoma buzilganidan so‘ng, Hanter Bayden aybini tan olishdan voz kechgan.
Izoh (0)